مرحلة التصوير في مشروع قرّب المسافه علي وشك الإنتهاء ودلوقتي بنحاول نبدأ مرحلة المونتاج في اقرب وقت

يوم التصوير إتفاجئت بكم الطاقه الإيجابيه اللي موجوده وسط الناس واللي بيتعاملوا بيها الناس مع بعضهم .. كل واحد من المشتركين في المشروع شخصية متميزة جدا ومبدع جدا في ناحية مختلفه

من اكتر المشاريع اللي اتبسط بالشعل فيها ..لأن كل الطاقه دي كانت تطور طبيعي للي بدأناه .. والطاقه دي بأه هي اللي خلت الناس لما تساعدنا تساعدنا بقلب !

وفي  معظم الأوقات من غير مقابل .. ومنهم علي سبيل المثال – لا الحصر- المصور الجميل محمد علي الدين اللي جه وقضي معانا يوم كامل تطوعيا علشان يصورنا واحنا بنشتغل

يوم التصوير ده فعلا كان ممتع  !

ادعولنا بقي ان مرحلة المونتاج تعدي علشان تقدروا تشوفوا الشغل ونعرف رأيكوا فيه

الصورة تصوير محمد علي الدين

وصور أكتر لــ قرب المسافه .. هناك

 عارفين اهم حاجه في مهرجان الساقية – او اي مهرجان تاني ايه – ان الناس بتشوف بعض :- ) .. مبحبش الرغي كتير في حوارات لجنة التحكيم ولا الجوايز راحت لمين ولا مراحتش لمين .. واللي بيتكلم عن ده هما ناس فاضية زياده عن اللزوم مالاخر  !لكن مهرجان الساقية بيعتبر فرصة كويسة اوي لأنه مجمع – تقريباً – كل الإنتاجات التسجيلية اللي تستحق المشاهده  .. فهو” لقيّه “  للي بيحبوا الأفلام التسجيلية او مهتم بيها

نهايته .. فيه فلمين برشحهملكم علشان تشوفوهم

الأول هو فيلم : سكتك خضرا لمهند دياب -  مدته عشر دقايق

المفروض يتعرض تاني فيلم  أول ايام المهرجان – السبت 18 يوليوا

والثاني هو فيلم : شعبي   إخراج. أحمد رحال وكتابه الشاب ناجي

والمفروض يتعرض تاني يوم

أشوفكم هناك..

النهارده الجمعه 21 من شهر نوفمبر سنة 2008 .. صحيت من النوم الساعه سبعه الصبح .. وانا متفائل بيوم جديد .. ويمكن اليوم ده تفائلي كان منطقي شوية

 لأن ولأول مره في تاريخ مصر كان هيبقي فيه تلات مهرجانات سينمائية متزامنه .. الأول هو مهرجان القاهره الدولي واللي بتنظمه وزارة الثقافة المصرية .. وللي للأسف مش أي حد يقدر يحضر فعالياته ” صحافه وطلبه وأعضاء جمعيات فنية بس”  .. والمهرجان التاني هو مهرجان القاهره للأفلام المستقلة واللي بيتنظم في مسرح روابط .. وبيتميز بأنه بيفتح دراعاته لكل هاوي وغاوي .. والدورة دي هي الدورة التانية .. وهي دورة مؤجله من العام الماضي .. لأنه إتلغت أيضا في اللحظات الأخيره ولم يعرف السبب

 اما المهرجان التالت فهو مهرجان القاهره الأول لأفلام حقوق الإنسان .. ودي بتعتبر دورته الأولي .. وناس كتير متنبئين له بمكانه مهمه

 وللتذكرة طبعا .. اننا لسه خارجين من مهرجان مازيكا جاز .. فعاليته كانت موجوده في كل مكان من اول ساقية الصاوي لغاية مسرح الجنينه

 وكان من المقرر ” وتم بالفعل ” عرض فيلم بصرة للمخرج أحمد رشوان ضمن فعاليات المهرجان الدولي وهي تجربته الطويلة الأولي .. واللي فعلا بتعكس أمل ما في شمس جديده بجيل جديد من السينمائيين انا معتقد انه مشرق للغاية

 وكان من المقرر برضه ” ولم يتم ” عرض فيلم عين الشمس ضمن فعاليات المهرجان المستقل للمخرج إبراهيم البطوطي واللي بيعتبر صورة تانية للإشراقة الجديده

-شوفتوا بقي ..أد ايه كان عندي أسبابي الوجيهه جدا للإنبصاط والمزاج العالي والتفاؤل   .. مش كده؟ .. اهي كده فعلا القاهر قاهره ..

 لكن إزاي وإزاي .. إزاي وإزاي يفضل جوايا حبة تفائل .. ليه كفا الله الشر .. هي البلد دي مفهاش حكومة ولا ايه ؟

معدتش ساعات قليلة إلا وعرفت خبر إختطاف المدون محمد عادل .. واكني الدولة .. عايزة تقسملنا وتحلفلنا  انهامُصرة إصرار كامل تام علي إنتهاكها لحقوق الإنسان وقمعها للحريات .. وقهرها للشباب .. وعدم  إعترافها بأي شرعية الا شرعية اللا شرعية

وبعديها بساعات قليله عرفت ان مهرجان القاهره للأفلام المستقلة  اتأجل عشر ايام .. وقريت بيان .. مبتدي بكلمات من عينة ” ببالغ الحزن والأسي والغضب نبلغكم بأن المهرجان تم تأجيله لأسباب قهريه ..

والناس بان علي وشها القهر وهي خارجه من مكان العرض بعد ما كانت داخله متطلعه لمشاهدة أفلام مش زي الأفلام

-

وبعديها بساعات قليله ” تانية “ عرفت خبر إحتجاز المدون والمخرج براء أشرف  في مدينة العياط .. وقت ما كان بيصور فيلم جديد  .. واخدينلي بالكوا من الحبكه ؟ ..

احتجز وقت ما كان بيصور فيلم جديد .. في نفس ذات الوقت .. اللي بتحتفل بيه الدولة بمهرجان برضه عن الأفلام .. وعاملين ريد كاربيت .. وجايبين مخرجين من بره .. وبتاع .. قولوا ورايا .. بلا ستين وكسه

–

شوفتوا بداية اليوم كانت إزاي ونهايته كانت إزاي ؟

شوفتوا مين اللي بيقتل كل حاجه حلوة في البلد .. شوفتوا مين اللي حالف يمين تلاته يكرهنا فيها .. شوفتوا في النهار كنا فين .. وفي الليل  بقينا فين ؟

مستنيك ياصبح .. والله مستنيك

إيناس الدغيدي مخرجة فيلم مذكرات مراهقه والباحثات عن الحرية وكلام الليل وإستاكوزا ودانتيلا وماتيجي نرقص وأفلام تانية مش فاكرها

في مهرجان جمعية الفيلم اللي للاسف انا عضو فيها من 4 سنين .. كان فيلم الباحثات عن الحرية معروض ضمن فعاليات المهرجان اللي بتنظمه الجمعية سنوياً.. وكنت منتظر فيلم جامد زي ما قريت عنه في المقالات النقدية .. لكن للأسف يظهر ان المقالات دي معظمها كان مجاملة لدكتور رفيق الصبان كاتب الفيلم!

بعد العرض ما خلص .. ولحسن حظ المخرجه والجمهور أيضا .. كانت المخرجه مسافرة ومحضرتش الندوة .. اللي كان جمهورها محتد جدا فيها!

لكن حضر الندوة مدير التصوير اللي أخرج فيلم أبو العربي ” مش فاكر إسمه ” وبعد ما كتير من مشاركات أعضاء الجمعية ” اللي معظمهم نقاد في جرايد مختلفة .. قمت وعلي غير عادتي إخترت إني أعلق علي المشاركات وقلت بالظبط .. “انا مش عارف إنتوا مضايقين كده ليه .. الفيلم هايل .. ومعجزة سينمائية عظيمة ولكن في مستوي إيناس الدغيدي .. هو ده مستواها ومتقدرش تدي أكتر من كده”

ورجعت للكرسي وانا مراقب نظرات الحضور وإبتسامتهم اللي معرفتش هل هي كانت علي صغر المشاركة ولا علي المشاركه نفسها,

بعد المقدمة اللي لابد منها دي .. أحب اقولكم أن موقع الشبكة العربية لمعلومات حقوق الإنسان طالعنا بخبر بيقول إن أحد المحامين طالب شيخ الازهر بجلد إيناس الدغيدي علي خلفية إخراج فيلم مذكرات مراهقه .. بسبب تسوئ سمعة مصر بنات مصر !!

وبالمصادفة أو ربما أكثر .. نفس المحامي ده هو اللي طلب قبل كده بتقطيع إيد ورجل عبير صبري .. علشان قلعت الحجاب!

ومش دي المره الاولي اللي تتعرض فيها إيناس الدغيدي لحاجه زي دي .. أعتقد إنها حصلتلها مرتين أو أكتر!

طبعا المحامي المبجل بيصنف نفسه علي إنه إسلامي ..

والسؤال الأهم .. إن كانت الدولة بتنظم ده بشكل غير مباشر دلوقتي .. لما تبقي دولة دينية .. والسلطة اللي بتحكمها سلطة دينية .. هيبقي ايه الموقف!

اخر مره كان عندي برد مصاحب لإلتهاب في الحنجرة .. كنت بسببه فعلاً مش عارف أتكلم وكان كل كلمة بنظقها .. مش بتكون واضحه لأن بيتخللها في نصها ” كُحه ” .. بالإضافه إلي نوبات من الكحه الطويلة اللي كانت بتصحيني من النوم وتقلقني لمدة ساعات ..
روحت لدكتور والتاني وخدت دوه .. وبقيت بشرب مشاريب سخنه أكتر من الميا .. لكن كل ده مكانش جايب همّه ..
لما الموضوع طوِل كان عندي إستعداد لو حد قاللي إتشقلب تلت شقلبات في الهوا وأهرُشْ هرشِتين في دراعَك اليمين وانت تخِّف .. إني أسمع كلامه وأنفذه بدون نقاش..
ساعتها .. وبعد ما زهقت من الإيقاع الممل اللي بقت حياتي فيه بسبب الكُحه دي .. وفي ليلة خميس أُجبرت إني أقعد في البيت ومخرجش ولا اسهر في اي حته .. قررت إني أستمتع باللي حوالية في البيت أو بمعني تاني أحوال أن أسمتع بالمتاح.. فلما خدت دش .. حاولت أغنّي .. مع تخيُلات غير مريضه بصوت الميا اللي بينغّم مع صوتي الوحش .. ومع الليفه اللي إفتكرت نفسها كمانجه وهي بتلف علي جسمي .
لما خرجت .. فتحت الكومبيوتر وقعد تايه بين الفولدرات بفتح في واحد واقفل التاني من غير خطه ولا هدف سرحان أكتر ما انا بحرك الماوس وبدوس علي زرايره ..
لغاية ما وقع قصادي الفولدر المحبب ليا علي الإطلاق وهو الخاص بأغاني ثومه
اشغّل أغنية إيه ؟ .. بسئل نفسي .. لغاية ما قلت خلينا نبدأ الليلة بألف ليلة وليلة .. دوست كليكتين عالاغنية .. علشان الوين أمب يفتح .. وتسكت كل أصوات الدوشة من حوالية وصوت كلكسات العربيات في الشارع .. وأكني المنطقه المحيطة بيا كلها بقت مسرح الست اللي سِكت لما الست قامت بعد مقدمة المزيكا ..
وإبتدت الست تلعلع وهي بتقول .. ” الليل وسماه .. ونجومه وقمره .. قمره وسهره .. وإنت وأنا .. ياحبيبي أنا .. ياحياتي أنا .. ”
بصيت حوالية منتظر إن كل حاجه هتقع عليها عنيا هتكون بتحتفل بليلة الخميس بطقوس مختلفه عن كل ليلة في وجود القوة الخارقة اللي اسمها صوت أم كلثوم.
يعني مكنتش هستعجب أوي  لو شوفت كراسي السفرة قربت أكتر من بعض .. أو الفناجيل جوه النيش بقت أكثر بريقاً أو حتي النور بقي منوّر أكتر او قرر أنه يرقص بإضاءته عندما تصل أم كلثوم للذروة وهي بتقول ” هو العمر إيه .. غير ليلة .. زي الليلة .. زي الليلة ”
مع إنفراد الليلة دي وتميزها بالنسبة لي بشكل كبيرة لكن مكانتش الأولي من نوعها لكن كان فيها ما يميزها بشكل كبير جدا وهو إني وبدون أن أشعر .. بعد ما الأغنية خلصت وكنتت غنيت معاها بشكل شبه كامل .. مكحتش تاني !!
إستغربت ولكن تظاهرت بالعكس .. وحاولت إني أصدق ان الموضوع مش أكتر من إن مفعول الدوا الكتير اللي خدته أخيرا جاب نتيجته!..
مخبطش علي بابي حد من الجيران علشان أوطي صوتي مع إن صوتي موضوف بــ”الوحش للغابة من الجميع “.. حتي المجاملين بيطلبوا مني إني مسئلهمش عن صوتي .. علشان محطهمش في مأزق ..
ومنكرش إني كان نفسي صوتي يطلع حلو .. وأغني في كل وقت أعوز مش بس في الحمام وسط الصابون .. بس اهو .. مطلعش بقي.، كنت دايما بحسد الناس اللي صوتهم حلو .. لأنهم كــ ” باور” وكقوة بيقدرو تكون نفسيتهم أكثر راحه وبيخرجوا طاقتهم السلبية أول بأول في التفريغ بالغنا ” علي حد زعمي ”

بعد ما حضرت حفلة إسكندريلا اللي كان منظمها حزب الجبهة لأعضاءه علشان يدفعوا الإشتراك .. اللي تقريبا الحزب نقي طريقة طريفه جدا علشان ياخد الإشتراك بيها .. مما أجبرني كواحد مكنتش ناوي إني أدفع الإشتراك .. إني أدفعه وأنا مش مدايق “أوي” لأني حضرت بعديها حفلة لفريق إسكندريلا ..
الهيدر بتاع إسندريلا إسمه حازم .. شاب بيلعب عود بطريقه مش “عادية” بكل ما تحمل الكلمة من معاني .. غناه ودخوله جوه الأغنية بروحه وبجسده وهو بيغنيها .. يخليه لو عمل اي حاجه ” كلمه او لحن ” هي أصلا بره الغنوة .. بمجرد ما يعملها الغنوة تاخدها بالحضن وأكنها بتاعتها من زمان
لحازم لحظات ذروة وهو بيغني .. لحظات عميقة جداً .. وفعلا بستغرب إني شايف القوة والطاقه دي كلها خارجه منه !
ضِحك شهاب بصوت مسموع لما شبّهت لحظات ذروة حازم  وهو بيغني..  بــلحظات إنتفاضه جنسية وقت الوصول للذروة .. بتخرج فيها كم عالي جدا من الطاقه الغير عادية من الجسد والروح في وقت واحد ..
–
كلمة أكابيلا .. أو acca pella  هي كلمتين إيطاليتين معناهم الكلام الجميل .. وده مصطلح بيطلق علي الغنا بدون مازيكا
كورال الفيحاء اللبناني .. صنف عالميا الكورال الأول اللي بغني أكابيلا!!
.. بطريقة ممكن تشوفها في اللينك ده
وخد بالك يابش أفندي من الذروة الأخرانية في الأغنية علشان فيها كل المعاني اللي إنحيازها الكامل للإنسانية ..

وزي ما عبده نصه بيقول .. هكذا يجب أن ينجاز الفن !

وللي عجبتهم الأغنيه دي .. عندي خبر حلو ليكوا .. مؤخرا قدرت أوصل لواحد من الكورال ده .. وأكدلي إنهم جايين مصر في شهر ديسمبر اللي جاي علشان يحيوا أكتر من حفلة .. وطبعا قولتله أول ما يتأكد المعاد يبلغني علشان اقولكوا.
من كتر إعجابي بـ”الأكابيلا” كنوع من الغنا مش المزيكا .. إخترت إني أحط أغنية مصر هي أمي في تجربتي التسجيلية  كش ملك كــ” أكا بيلا” .. ويمكن ده كان أكتر فيرجين عجبني من الفيرجينس الكتير اللي تعَبت فيها عم أحمد رستم في الإستديو .

أعتقد إني قريب هرفع الأكابيلا دي علشان اعرف رأيكوا فيها ….

لما النعش كان في طريقه للخروج من قاعة كنيسة الروم كاثوليك بالفجاله .. كل الناس ثقفت التثقيفة الأخيره لجو !
واول ما خرج من باب القاعه .. عليت الاصوات من غير ترتيب مُسبق بأغنية ” عللّي صوتك بالغنا .. لسه الأغاني ممُكنة .. ” وتداخلت أصوات البكاء مع الغنا ” .. النخل باصص للسما للسما .. ”
شوفتوا مشهد النهاية .. حلو مش كده ..؟
-
طب بلاش ده .. لما دخل أحدهم وهو بيثقف وبيقول مندوب الريّس وسعوا .. واحد قال بصوت مسموع “وطّي صوتك ليسمع يقوم من نعشه ويسبّله ميت مِلّه”
-
ونرجع لمشهد النهاية اللي بعد الغنا ظهر “أبو عيطه” بره الكنيسة وهو بيقول ..
كان معانا في المظاهره .. كان بيفتّح مليون زهرة
لسه ما بينا مبدعين .. لسه ما بينا مفكرين
-
لما كان النعش ملفوف بتلاميذ جو .. وجت ناديه الجندي .. واحد بصلها وهو متغاظ وقال بصوت بالكاد مسموع .. “ماتروحوا تعملوا مقابلات وتسيبونا إحنا معاه “..
بره الكنيسة .. قال أحدهم .. خلصونا بقي ياجماعه .. مش عملتوا القداس ؟

أصدرت المحكمة منذ دقائق حكمها ببراءة صاحب العبارة – ممدوح إسماعيل – وإبنه ” الهاربان ”
العبارة غرقت في فبراير 2006 وكانت تقل 1400 مصري وعرق معها أكثر من 1000 من اركاب

وتم تقديم خمسه إليه المحاكمة كان من بينهم ممدوح إسماعيل وإبنه – اللذان كانا قد هربا -
وتم الحكم بالحبس علي واحد فقط من الخمسه وهو القبطان – الذي توفي بالفعل .

في طريقي من وإلي الجامعه أشاهد إمرأه في الخمسين او الستين من عمرها تقف في كشك يبيع أدوات يحتاجها طلاب الجامعات من كشاكيل وورق ولا مانع أيضا من موبايل للتحدث بخمسين قرش
وعند إنتهاء المحاضرات حيث لا تبخل بالظهور شمس الأصيل .. تخرج المرأه لتجلس علي الجانب الأخر مستمعه إلي أم كلثوم من خلال الراديو القديم الذي يخرج صوتا غير كامل الوضوح
أنظر إلي هذه المرأه ” المصرية ” في كل مره مررّت من هذا المكان متأملا وجهها البشوش -دائماً – وشعرها الأسود الغير جذاب
سائلاً نفسي .. هل هذا المشهد المصري سيظل موجود إذا وصل أي فصيل ديني إلي الحكم
سألت نفسي .. هل سيظل هذا المشهد موجود في ظل دولة ليست مدنية ؟

لا أريد أن اكون جزءا من موضه التحدث عن الدولة المدنية والدينية .. فما تحدث بها من
أصدقاء حتي الأن أعتقد انهما أجدر مني بالتحدث عنها..

قرأت مقالا أمس كان بتناول المهادنة غير المبررة من قبل الحكومة والحزب الوطني في الهروب دائماً من العلاقة بين الدولة والمؤسسات الدينية
وكالعاده لم أجدا إجابة ككاتب المقال !
(1)

كنت مؤمن تماما بأن الإخوان ” داخل التنظيم او خارجه ” مسيطرين بشكل كبير علي الإعلام بشكل عام .. ولا أستثني من سيطرتهم التليفزيون المصري او الجرائد القومية
سيطرة كسيطرة حماس في فلسطين وسيطرة حزب الله في لبنان….

ولكن لا أستطيع أن أخفي إندهاشي الشديد من قيام -قناة روتانا سينما – بحذف مشهد من فيلم طيور الظلام

حذفًا لا تبخل بعده ان تصف روتانا بأنها قناه إخوانية وأداة في صدد سيطرة الأخوان المسلمين علي الإعلام الناطق بالعربية من خلال أكثر من صورة

وإذا كان الإخوان المسلمون – أكرر : أعني الإخوان المسلمين فكرياً وليس تنظيماً – قد نجحوا في الوصول إلي كل المحركات الإعلامية والسيطرة عليها .. وبث أفكارهم لكي تصبح من مسلمات وثوابت المجتمعات

سأظل – ولو حتي بصفه فردية – مذكرا بما يحاول البعض إلغاءه وشطبة من مصريتنا
–
وللتذكير المشهد الذي أقصده هو : الذي يظهر فيه عادل إمام في مكتب رياض الخولي ” المحامي الإسلامي ” وهو يدعو علي الإخوان المسلمين مؤمّنينّ هُم علي دعاءه
الدعاء الشهير الذي طالمت رددّته ..
اللهم فرِق جمعهم .. وشتتّ شملهم
اللهم فرِق جمعهم .. وشتت شملهم
اللهم أجعلهم حبظلما فنظلليًا ..
ءاااامين

(1)
http://www.almasry-alyoum.com/article2.aspx?ArticleID=114054

زي النهارده من سنه وبالظبط يوم 28/6/2007
كان اليوم الاول لعرض تنهيدة في نقابة الصحفيين ضمن يوم فني كانت منظماه ون شوت .. فيلم تنهيدة أتعرض مع فيلمين لسمير ورمضان
قبل العرض ..قلت في نفس المكان اللي اعلنت فيه الإنتهاء من التجربه .. انه مجرد تجربه وإنطلاقاً من إن خان قال إن الإخراج السينمائي حق لكل مواطن .. فأعتبرت نفسي تجاوزاً مواطن وكانت لي تنهيدة
تنهيدة بعد كده إتعرض حوالي 18 او 20 مره .. بصراحه في الأخر مبقتش أعد ..
وشارك في مهرجانات محلية ومش محلية وبرضه مبقتش أعد .. في كل مهرجان من دول كنت ببقي متأكد انه لن ينال اي شئ لإيماني الكامل أنه تجربه .. ومجرد تجربه .. ومحتمل إحتواءه كل أخطاء التجارب الاولي متجمعه
بعد كده .. فكرت ومن غير مناسبة ان التجربة التانية تكون وثائقية .. ولو اني الأفلام الوثائقية كتجارب دائما ما كانت هنك جهات منتجه ” مؤسسات او قنوات تليفزيونية ” حتي أصبحت حشو وقتن في الفضائيات او مجرد سبوبه لا اكثر ولا اقل
وعشان مكونش مضلل … واحد زي تامر عزت .. مونتير في الاصل .. وعمل فيلمين من إخراجه .. مهمين اوي منهم فيلم اسمه مكان اسمه الوطن .. المهم خلينا في موضوعنا
–
قولنا في شهر اتناشر اللي فات .. خلينا نعمل ” كون شوت ” تجربتين .. – نحاول – من خلالهم اننا نوثق بعض خطوط التاريخ المصري الحديث ..
التجربة الأولي هي فيلم المرابطون وبيقوم بإخراجها سمير .. ودي بتتكلم عن الحروب اللي دخلتها مصر وإن شاء الله هتكطلع للنور قريب
–
والتانية هي كش ملك واللي – بتحاول – ان توثق لتاريخ إستقلال القضاء المصري فقي
خمسين سنه
–
واخدلي بالك يامعلم من بتحاول دي .. بتحاول ها .. التجربة بتحاول .. يعني ممكن تكون محاولة في محلها وممكن بكل بساطه متكونش .. هي لا تزعم ان كلامها مُنزل والمصدق به ولا تزعم الحيده ولا تزعم حتي انها الوحيده
اشطا ؟
–
مش هتكلم اكتر من كده عن كش ملك .:. لكن جاهز تماما لإستقبال ارائكم فيها بعد العرض
– بس عايز اتكلم عن القضاه ومجتمعهم الخاص اوي
–ولا بلاش ؟؟
طب هقول كلمتين بس ..
انا واحد بجح .. وش مؤدب مع كل الناس .. وبالعافية افخم لقب بحطّه للي قدامي هو استاذ ..
في اول مره قابلت فيها المستشار زكريا عبد العزيز رئيس نادي القضاه.. مبقتش عارف اقوله ايه ..
كلمة باشا مش عارف انطقها .. وسيادتك تقيله علي لساني .. وأستاذ مش لايقه مع الهيبه
طب أعمل ايه في الوقعه دي بقي

.. فعلا كانت من أكبر المشاكل اللي واجهتني
لا بصراحه مش اكبرهم .. في مجموعة محترمه من المشاكل بعد كده حصلت .. بس مش هتكلم عنها عشان لو إتكلمت عنها هديها حجم أكبر من حجمها

==
وبشكر كل اللي متدرتش في مساعدتي علشان الفيلم ده يطلع .. سواء كان نادي القضاه او حركة شايفنكم والإعلامية بثينة كامل او وائل عباس وعبد الحي .
ووعمر سيزر اجمد ديزاينر اللي عمل بوستر الفيلم
و المايستروا والملحن والموزع احمد رستم .. وفرقته الجميله اللي شاركت في الفيلم باأدائهم
والبيت هبه اللي صوتها دافي كده زي النيل ووسط البلد وكورنيش إسكندرية

–
اما اصحابي الجدعان اللي ساعدوني في كل حاجه من اول ما بدات افكر في الفيلم مش عارف اقولهم ايه بصراحه .. بس ابقوا فوتوا عالحسابات وانتوا خارجين ..
–
نسيت اقول ان الفيلم اشتغلت فيه من شهر اتناشر 2007 حتي يونيو 2008
وتعالوا شوفوه بقي
http://www.facebook.com/events.php?ref=sb#/event.php?eid=17291993741

kak kak is very short MOB. Movie.

realy it was a Different experience.

would like to Listen your opinion.

http://www.youtube.com/watch?v=fxTa22IJjhg