اضيف في 26 يناير, 2010 11:44 م , من قبل تامر
من مصر

قسما بالله انت ماتعرف حاجة
وكلامك على الفاضى وانت اصلا ملكش لزمة علشان مافيش حد بيظلم حد وبالذات فالكلية دى وانت لو راجل استنى يومين بس وحتشوف اللى يحصلك
انا عملت برنت للصفحة وحوريك الكلية دى حتعمل فيك
انا حوصله ان شاء الله للكلية

ده التعليق اللي اتكتب علي تدوينة احمد مصطفي بعد مرور سنه علي كتابتها ! وواضح ان صاحب التعليق مكدبش خبر وبعد مرور حوالي شهر .. وبالظبط يوم الخميس 25 فبراير 2010 تم إحتجاز أحمد مصطفي – 19 سنه – وتقديمة لمحاكمة عسكرية ( عاجله ) ليلحق بقطار المحاكمات العسكرية للمدنيين كمجدي أحمد حسين وأحمد دومه وخيرت الشطار و – أصحابه – علشان تحصل محاكمة جديده لشاب سنه 19 سنه .. عارفين يعني ايه شاب عنده 19 سنه يتقدم لمحاكمة عسكرية ! لمجرد انه كتب حاجه عالإنترنت !

تدوينة أحمد مصطفي لم تفشي سرا حربيا او نقلت صورا – خاطئة – عن اي مؤسسة من مؤسسات الدولة ! تدوينة أحمد مصطفي  لا تصنف علي انها خيانه او عماله او فتح ملفات حمراء ! تقديم أحمد مصطفي للمحاكمة العسكرية خيانه ـ وسكوت المثقفين والسياسيين عن هذه الخيانه خيانه أشد جرما واحط وصفاَ

متضامن مع أحمد مصطفي

روابط ذات صله :

نص القانون المعد للمحاكمة .. وهو من خرائيات زمن عبد الناصر

جروب لا للتجنيد الإجباري

مجدي سعد صاحب مدونة ” يلا مش مهم “  وعبد الحمن عياش صاحب مدونة وعبد الرحمن عياش صاحب مدونة” شغبطة غريب ” تم إحتجازهم من مطار القاهره منذ منتصف ليلة أمس

بجانب إعتقال مجدي أبو خليل في الفجر من منزله ومصادرة مكتبته

… … …

حملة فوق الهايله بتنظمها مصلحة الضرائب العامة بقالها دلوقتي سنتين تقريبا
واستكمالا للسكه اللايت اللي واخداها من ساعة ما بدأت
بيظهر الممثل ويوضح للمشاهدين ان اللي مش بياخد فاتورة بمثابة ان البياع بيلبسه ” العمه ” لما شوفت الممثوهو رافض بشده وبيقول .. لا،مش انا اللي اتعمم .. فكرت كده بشويش .. في شوية حاجات
الحكومة اللي هي مصلحة الضرائب العامة يعني ..بقالها سنتين بتوصل للناس ان الضرايب واجب وطني واللي بيتهرب منها اكنه بيتهرب من الجبهه وقت الحرب !!
طب لامؤخذه يعني هي مش فلوس الضرايب اللي احنا بندفعها دي هي اللي بتشغل المؤسسات الحكومية اللي منها ” علي سبيل المثال يعني ” التلت جرايد اللي بتثقف للحزب الوطني في الطالعة والنازلة !!!!
لا وضيف عالتلت جرايد .. حاجه بديعه كده إسمها روز اليوسف .. واللي مش بتثقف للحزب الوطني بس في الطالعه والنازلة .. ولا متخصصه في التطبيل للجنة السياسات اللي بترقص ” استرب ” سياسي … لا دي كمان معندهاش شغلانه غير الشتيمه في الاخوان المسلمين … اللي عددهم لا يستهان به وسط الجمهور وبيدفعوا ضرايب برضه
يعني بيدفعوا ضرايب عشان يتشتموا ولا مؤخذه
ده غير طبعا “عبد الله باشا كمال” لما يفرد كده كام صفحه في الجورنال شتيمه في حد معين كتصفية حسابات خاصه جدا ” من جيب اللي بيدفعوا الضرايب برضه ” اللي هوه جيبي وجيب اهلي واهلك كمان
لا ومش بس كده خد عندك بقي ياسيدي التليفزيون المحلي وبلاويه واللي بيجري فيه
تخيل يامواطن ” ياللي مش متعمم ” انت اللي بتدفع تكاليف النشرة اللي الست فيها بتيجي وبتقولك ان كله تمام والريس يضع محدودي الدخل في اولوياته
ويعد الجميع بثبات الاسعار في الفترة المقبلة
مين اللي بيسرق
المتهربين من الضرايب ولا مصلحة الضرايب العامة ؟!!!!!!!!
السيد وزير الملية .. والسيد رئيس مصلحة الضرايب العامة .. احنا ممكن ندفع ضرايب بس عشان تخدمونا بيها .. مش عشان تشتمونا بيها وتلبسونا ” العمه
طبعا مش ده بس اللي بيتعمل بالضرايب .. ممكن تكون بيتبني بيها مستشفيات او مدارس .. او كباري .. لكن كمان بيتصرف بيها علي وزارة الداخلية .. اللي وظيفتها الاولي هي حماية الحزب الوطني من اي خطر داخلي