من كم يوم ..إستقبلت خبر إلإغلاق قناة الرحمة بتنطيط وتزييط غير مسبوق ! ولو ان الإغلاق جاء تنفيذ لحكم محكمة فرنسية علي دعوة قامت بيها جماعه يهودية .. لكن في الأخر خبر إسكات اي لسان للتطرف حاجه إيجابيه .. ويبقي السلبي في الموضوع ان الحكم مش جاي من محكمة مصرية !
لكن إيه .. أوعي وشك .. السلفيين صيّع برضه .. وقالو زي محمود عبد العزيز ما قال ف فيلم الكيف .. احنا لحم مر ميتاكلش .. وان اتاكل ما يتبلعش وان اتبلع يجرح ف الزور ومش عارف ايه !
فاكرين زمان ف 2004 لما ايمن نور كان بيقدم علي حزب الغد ؟ .. كان كل مره ميتوافقش عليه كان يقدمه بإسم جديد .. يعني مثلا مره يقدمه بإسم حزب الغد .. ومره الغد قادم .. ومره الغد الجديد وهكذا ! .. كان ناقص يحط – أندر سكور – او ارقام جنب الإسم يعني !
المهم حبايبنا الحلوين بتوع الرحمه .. عملوا نفس الموضوع ! .. قفلوا الرحمه – الأولانية – تنفيذا لقرار شركة النايل سات اللي هو رضوخا للحكم الفرنساوي ! وفتحوا قناة جديده خالص بتردد جديد خالص .. بنفس اللوجو والبرامج والشيوخ والإعلانات والأفكار وسموها – نسائم الرحمة -
اه والنعمه .. ايه البلد اللي بترمي إيفهات عالواحد طول ماهو قاعد دي ؟ .. دا إسمه ألش معاليك!
وطبعا الناس تضامنوا .. وظهرت المشاركه الإجتماعية بأنهم بعتوا رسايل عشوائية عالموبايل وإيميلات إسبام بالتردد الجديد !
