الشهر اللي فات – ديسمبر 2009 – جه عدد كبير من الناشطين الدوليين في محاوله لفك “الحصار” عن غزة ولأن الحكومة المصرية غتت تحول الموضوع لمظاهرات في شوارع مصر اللي قدام السفارة الفرنسية واللي قدام الأمريكية – اللي تم الإعتداء عليهم – واللي قدام نقابة الصحفيين !
طبعا الناشطين واجهو في مصر معامله زي الفل من الأمن وتم ضربهم في اكتر من مره كان ابرزها قدام السفارة الأمريكية
قضية غزة قضية إنسانية والتضامن معاها تضامن مطلوب   طول ماهو تضامن مع الناس مش مع سياسات هنا او هناك  !

عايز اتكلم بقي عن كذا نقطه كنت مأجل فيهم الكلام لغاية ما اروء .. وبإعتبار اني رايق وعندي امتحان يوم الخميس فخلونا نتكلم !
أولا جالاوي .. واللي بعض الشباب سموه جزالاوي
جالاوي نائب بريطاني ممكن تطلق عليه لقب – محترف شرق اوسط – الراجل كان حالف ميت يمين انه يعدي من علي سوريا ف الرايحه او الجايه لسببا في نفسه .. غير ان كذا مصدر اكدلي وجود اسمه في كشوف كوبونات البترول  بتاعة صدام .. واللي كان بياخد منها برضه اسماء بارزة جدا في وسط المعارضه المصرية ومش هقول هما مين عشان انتوا اكيد عارفين !يعني ..  .. فهو يري فيه ما لا نري ! ولذلك سمي بمحترف شرق اوسط
جالاولي بقي في عز ما كان في غزة – طبعا داخل من مصر – قال انا لا يشرفني اني ادخل مصر تاني .. وفي طريق العوده دخل مصر وراح المطار في حماية لامن وطار عائد لبريطانيا مره تانية . وبعد ما وصل بالسلامه .. حسام زكي – المتحدث بإسم وزارة الخارجية – صحي من النوم – لانه اكيد كان نايم – وقال تصريح بيأكد فيه ان جلاوي شخصية غير مرغوب فيها داخل مصر !.. طب بعد ايه ياراجل .. ايه حركات العيال دي .. يعني هو قال مش عايز ادخل مصر وهو ف غزة .. ودخل مصر وخرج من مطار القاهره وباسبورة اتختم من الامن المصري .. وبعد ما يروح بلدهم بالسلامه … حضرتك جاي تقول شخصية غير مرغوب فيها !؟
هو ده اللي قالولنا عليه محن دبلوماسي .. مُحن دبلوماسي من وزارة الخارجية في احسن صورة – - عايز اقول الله يرحمك ياسادات !

نيجي بأه لكود بينك – او حركة نساء من أجل السلام – واللي انا عن نفسي معجب بيهم جدا لأسباب هقولها دلوقتي
حركة كود بينك عباره عن مجموعة من الستات – شبه عبله كامل في خالتي فرنسا – وتقدر تفهم ده لما تشوف الفيديو ده !
كود بينك دول بأه فيهم حاجه انا مش فاهمها .. مقابلتش المنسق بتاعهم في القاهره الا لدقايق قليله ومتكلمناش في حاجات كتير .. لكن كل اللي قابلتهم من الناشطين الأجانب كانوا بيشتموا فيهم بقوة وبيضايقوا جدا لما يتقال ان كود بينك معبرة عن المسيرة !
طبعا كان فيه كمان ناشطين مستقلين ودول يمكن اللي يتوصفوا بـ ” من رحم ربي ” في الليله اللي فاتت دي كلها ! بصرف النظر عن إنتمائهتهم اليسارية !
-
عايز ارجع تاني لموضوع الحكومة بتاعتنا وتعاملها – الغلط ف غلط – مع موضوع المسيرة ده !
أولاً إختيار توقيت بناء الجدار اللي تحت الأرض في غزة – مكانش حبكه تبدا في الجدار قبل ايام قليلة من  بداية توافد الناشطين الدوليين اللي جايين مخصوص عشان غزة – مع العلم بأنه سد الطرق امام الأنفاق الغير شرعية في حالة حركة طبيبعية للمعبر شيء مفهوش اي غبار من وجهة نظري – وموضوع فتح المعبر هقول عليه كلمتين ف الأخر
ثانيا الحكومة اختارت – بكامل وعيها- ان الأمور تفضل عايمه ومش معروف اي حاجه عن خط السير – اللي هي محدداه – ولا المدخل اللي المفروض يدخل منه الافراد والمدخل اللي تدخل منه المساعدات وادت الفرصه لجالاوي انه يمثل ويقول دول بيمنعونا ومش عايزنا ندخل واحنا هندخل من رفح – مع انه معبر افراد بس -
يعني لو كانت وزارة – لامرخذه -  الخارجية  عملت خط سير للمسيرة وقالت في بيان محترم احنا بنرحب بالمسيرة الدولية وده خط السير اللي حكومة مصر اختارته واعلنت ده كله في الإعلام – .. مش كنا خلصنا ؟ ؟ ؟
لكن إزاي وإزاي .. البعاد تفكيرهم موصلهمش لده .. وبقت الصورة للعالم كله ان الأمن المصري بيعتدي علي ناشطين دوليين قادمين لفك الحصار عن غزة ! وده للاسف حصل عشان سببين – اولا احنا في دولة ديكتاتورية لا يزال المسيطر الأول فيها هو الامن وافراده – ثانيا – الخارجية المصرية مبتعرفش تشتغل !

تالت نقطه بقي واللي لغاية دلوقتي انا مش فاهمها .. حسام زكي – المتحدث الرسمي بإسم وزارة الخارجية – وبطل الببوست ده قال في تصريح مشهور اتنشر في كل الجرايد تقريبا ان الناشطين الفرنسيين خدعونا ودخلوا بتأشيره سياحية !!!!!!
ثانية ثانية ثانية .. هو فيه تأشيرة سياحية وفيه تاشيره مظاهرات ؟ لو حد فاهم الموضوع ده والنبي ما يبخل عليا !

وبالمرة بقي .. طبعا اكيد كلكوا  شفتوا الفيديو اللي رامي رؤوف رفعه و حسام زكي قال فيه ان الإيميلات متراقبه .. طب مادام هو ياحرام مبيعرفش يتكلم كده .. ليه بيحطوا قدامه ميكات ؟

بين قوسين – فهمي هويدي مفوتش موتة الجندي المصري اللي عالحدود الا لما قال ان السبب في قته هما اللي عطلوا المسيرة ولا قال تعنت حماس ولا غباءها السياسي ولا حتي دان الرصاص المتجه للمصريين  علي الحدود .. ولكنه اكتفي بإدانة اللي عطلوا المسيرة وضربوا الناشطين الدوليين في رفح !

اخر جاجه عايز اقلها هي ..  لقيتني وبالصدفه سجلت فيديو لأحد الناشطات القوميات في المظاهره اللي قدام نقابة الصحفيين .. واللي كان تلت تربعها – او اكتر ناشطين دوليين -
وقالت ياجماعه احنا عايزين نقاطع المسيرة دي علشان مشارك فيها امريكان وصهاينه – اه والمصحف قالت كده – الفيديو يمكن الكلام مش واضح فيه اوي بس واضح الخناقه بينها وبين ناشطه فرنسية واللي وصلت للضرب بالإيد وكانت هتزيد عن كده لولا ان كمال خليل مسك المايك وهتف
ده كان الغريب .. اما الاغرب بقي ان طلع ده مش موقف – الناشطه دي – بس دا كمان موقف جماعات سياسيه كبيرة ومعرفوه اتجاه المسيرة دي
يعني ناس يتعرف عنهم دائما دعمهم للقضية الفلسطينية وكل ما يخص القضية الفلسطينية – ويقاطعوا مسيرة اسمها مسيرة فك الحصار عن غزة لمشارك امريكان وصهاينه فيها !
هو إزاي فيه كده ؟