إسم النبي حارصهم
بقلب في التليفزيون زي ما حاكي الحواديت المصرية قلب …وفجأه لقيت ايدي وقفت عند قناه من قنوات الاغاني وكانت بتذيع حفله
خدني الفضول الي اني اشوف ايه هي الحفلة دي
لقيت ماشالله الحفلة دي لاختيار اسم النبي حارصه وصاينه ملك جمال مصر
انا واحد ما عنديش مشكله خاااالص في اني حفلات خاصه تتعمل ويعملوا فيها اللي همه عاوزينهم
وشايف ان كل مجموعه من حقها انها تتفق علي اي حاجه وتعملها
بس انا اعتراضي علي حاجات تانيه خاالص
ايوه اعتراضي مش علي فكرة المسابقه نفسها اللي قايمه علي اختيار اجمل شاب مصري
واللي برر ده الواد ابو عيون خضرة وشعر اصفر اللي فاز السنه اللي فاتت اللي اسمه ابراهيم عبد الجواد
ملك جمال مصر عينه خضرة وشعره اصفر .. امال ملك جمال فرنسا تبقي عينه عسلي
عم شريف بقي قال ايه ؟
قال انه المسابقه مش اختيار ملك جمال مصر
دي لاختيار فتي مصر الاول
شوفتوا ازاي ؟؟
المشكله عندي بدأت من اول الاعلان عن 26 متسابق لما اوصفهم بـ 26 عاهه ابقي مش غلطان
وكلهم ماشا الله هوايتهم التمثيل .. مبروك عالسيما ياخونه
وبيدرسه بيزنيس ادمنستراشن ” يعني زيي “
سيبكم بقي من المذيعه الهايله اللي كانت بتذيع الحفل
نتكلم عن اللبس احسن
العيال طلعوا ببطلونات كده من بعيد تبان اكنها “جيبه” .. وده لاني البنطلون واسع ونازل بشالستون .. ” يعني ضيق من فوق وواسع من تحت ” زي بنطلونات حسين فهمي كده
شايفين الحشمه ؟
بس ياخساره البنطلونات كلها مفتوحه من الناحيتين فتحه سغيره اوي من اول كعب الرجل لغاية مكان الامؤخذه في دي الكلمه كده الانر وير
دي فقره وعدت وقلنا معلش سيب الشباب يعيشله يومين
الفقره اللي بعديها وهي كانت بتاعه اللياقه البدنيه
يطلع كده كل متسابق ولابس المايوه بتاعه والبنات بترقص حواليه بشكل مقزز اوي ومقرف جدأ زي حفلة نهاية العزوبية كده .. عارفنها ؟;)
الجمهور بقي صوته يعلي اوي علي اللي مطول شعره وعامل فيها ….. استغفر الله العظيم
اقول ايه بس ياربي فيه اطفال قاعده
نهايته
انا مش ضد انهم يعملوا مسابقه لفتي مصر
او حتي لملك جمال مصر
انما لازم القائمين والمنظمين علي المسابقه يعرفوا كويس اوي
ان فيه فرق بين مسابقه ملك الجمال وملكة الجمال
واظن ان مقاييس الاختيار لازم تكون مختلفه
علشان تطلع الحفله بشكل مقبول ..والمسابقه بشكل كويس
الزميلة ياخي ا*ه لما كتبت عن الموضوع السنه اللي فاتت
اظن ان وجهة النظر مكانتش مختلفه كتير
وده باين مع الصورة المحطوطه اللي باين فيها شباب مايص اخر حاجه
