اذا كان ” الجميل ” محمد خان ققال في اخر حوار للمصري اليوم ان الاخراج السينمائي حق لكل مواطن زي ما طه حسين قال كده  التعليم كالماء والهواء …. انا عايز اقول مع اختلاف المقامات طبعا J ان الغنا هو كمان حق لكل مواطن بلغ من السن تلت سنين .يوم طويل انتهي الساعه 4.20 الفجر .. يعني فاضل علي الادان دقايق قليلة .. هدوء ملفت وهوا جميل مستمتع بيهم وانا واقف في الشباك .. ومن غير وعي .. او بنص وعي.. لقيت نفسي ركبت اغنية أم كلثوم  وهي بتقول .. وكفاية بقي .. تعذيب وشقي .. ودموع وفراق .. ودموع في لقي ..شوية شوية صوتي بدأ يفرد حبتين .. والاقيني بعيد الكوبليه تاني مع سلطنه وحالة مزاجية تشبة الحالة المزاجية المصاحبة لشرب الفوديكا… واتمايل وانا بقول … تعتب عليا ليه .. وانا بإيدية ايه ؟.. .. واسمع صوت الادان .. مع انضمام شفتاي عند الانتهاء من جملة … فات المعاااد ..دخلت انام بعديها مباشرة وانا مبتسم ومنكشح وحاسس بسلكان في المنطقة الجوفية عندي قمت تاني يوم ومكنتش لسه خرجت من الموود ودخلت اخد دش وانا يغني نفس الغنوة لكن طبعا المناخ كان مختلف .. بس تغير المناخ كان مواكب الحالة النيرفانية دي .. خطوط المياه النازلة من الحنفية المخرمة اللي اسمها الدش .. تحولت الي هارب متنوع الاوتار .. والشيء المسمي بالليفة .. تحول الي كمانجه وهي تتحرك علي كتفي وجسدي .. وفجأه تحول الحمام الي المسرح الصغير بدار الاوبرا به اوركسترا متناسق ومتوافق ولكن دوام الحال من المحال .. صوت بالخارج وجملة حقيقية خبطت في دماغي .. خلللص .. صوتك وححححححححش وفيه ضيوف بره  

لا تأسفن علي غدر الزمان فطالما …. رقصت علي جسس الأسود كلاب

ولا تحســــــــــبن برقصها قد علت … فتبقي الأٍسود أسود والكلاب كلاب

—–

انا كتبت بيت الشعر ده في ورقة  الاجابة

تفتكروا .. ممكن أتفهم غلط ؟

امتحان المحاسبة

يوم السبت .. او الحد

الساعه تسعة … او عشرة

بص ياحرنكش .. احنا نروح الحد الساعه 10 وخلاص

—————-

ده نص الميل اللي اتبعتلي من احد اصدقاء المخروبة

في الفترة القريبة اللي فاتت حظي كان كويس اني شفت اكتر من عرض مسرحي عاملاه المدارس والكليات

عروض المدارس اللي كنت ساعات بصحي بدري علشان اشوفها .. اصلها كانت بتتعرض الصبح في مسرح العباسية .. وعروض الكليات اللي كان معظمها بيتعرض في مسرح فيصل ندا في القصر العيني

بالنسبة لعروض المدارس كان بيبقي الأداء ضعيف والاخراج ملخلخ والمزيكا مهرية وبتاع .. لكن كنت بصحي بدري ” ودي حاجه مش سهله يعني بالنسبة لي ” واروح اتفرج علي العروض دي .. مش عارف ايه السبب بالظبط … بس يمكن ده راجع لعقدة عندي ” اكمني مكنش عندنا مسرح في المدرسة ” ..ز يعني .. بإعتبار اني دراستي ازهرية التأصيل فالحاجات دي ” المسرح والمزيكا ” مكناش نسمع عنها اصلاً

لما كنت بشوف العيال وهما عندها 11 و 12 سنه .. وعارفين يقفوا علخشبة ويمثلوا .. حتي لو كان التمثيل مش اد كده .. لكن انا عن نفسي كنت بحس باستمتاع غير موصوف وانا بشاهد العروض دي .

وفعلا فكروني باللذي مضي .