خبر عن مقتل ناقه مغربية في جنينية الحيوانات في ظروف غامضه ممكن يكون عادي لكن اللي مش عادي مثلا ان ام الناقه دي اتقتلت في ظروف غامضه برضه من فتره قريبه وبنفس الطريقه

القاتل بعد ما قتل الناقه الاولانية خد منها ربعها اليمين القدماني وبعد ما قتل التانية خد الربعين القدامنين ، الجريمة تمت بليل وزي ما الناس اللي في الجنينه بيقولوا ان الجنينه بليل بيبقي الظلام فيها دامس يعني اللي داخل لئلا مدرب كويس جدا جدا لئلا من اللي شغالين في الحديقة اصلا .. الخبر بيقول ان فيه خمسه شغالين في الجنينه بتحوم حواليهم الشبهات منهم مسئول الكافتريا كده وناس تانية

لغاية هنا والموضوع فيه حلقه ناقصه … الحلقه اللي ناقصه دي هي الدافع ورا ده … والدافع اكيد لغاية دلوقتي هو حاجه غريبه مش مفسره علي الاقل بالنسبة لي … طب تعالوا نقري السطرين اللي جايين دول

قال مصدر في الحديقة لـ«المصري اليوم» إن طريقة القتل ونوعية الناقة تؤكد أن الجريمة مرتبطة بالحصول علي أجزاء وعينة من جسد الناقة للوصول إلي مناطق أثرية، ودلل المصدر أن الجريمة الأولي انتهت بأخذ الربع الأمامي الأيسر بينما استولي القاتل في الجريمة الثانية علي «الربعين» الأيمن والأيسر

ياحلااااوة … لما قريت التفاصيل افتكرت حادثة بني مزار اللي لغاية دلوقتي مخدناش من الداخلية ولا الحكومة عقاد نافع عليها والموضوع مش بس تسيب أمني في الحديقه…. لا ده فساد المؤسسه الامنيه بحالها

اصل الموضوع مش بس واحد سهي عسكري وحطله مخدر ودخل او ايا كان ايه اللي حصل … الموضوع ان الوزارة اللي فاكره ان دبة النملة بتعرفها … طلعت …شرابة خرده وبطاطس بالكاتشاب …حتي مش قادرين يحموا الحيوانات الي في جنينه الحيوانات

هما اللي قدرو عليه وكان كبش الفدا المره دي هو مدير الحديقه اللي أقالوه

عروض متميزة جدا لأفلام ون شوت في جمعية نقاد السينما
36 شــ : شريف وسط البلد
يوم الأحد القادم 29/7 في تمام السابعة والنصف

ويلي عرض الافلام لقاء مفتوح عن ون شوت والافلام المعروضة
بحضور نخبة من نقاد السينما والمخرجين
ويدير اللقاء الناقد السينمائي : سمير فريد

ويعرض أفلام لمخرجي ون شوت
سمير عِشرة ، محمود صابر ، محمد رمضان

والأفلام المعروضة …….
لقمة عيش إخراج : سمير عِشرة
تنهيدة إخراج : محمود صابر

و ” عرض أول ”
بتوع كل يوم إخراج : محمد رمضان
يوتوبيا إخراج : سمير عِشرة

في إنتظاركم في عرض مميز جدا يوم الأحد 29/7 الســـــــــــ7.30ـــــــــاعة السابعة والنصف

في جمعية نقاد السينما 36 شـــــ : شريف - وسط البلد

 

 

إمبارح دخلت فيلم مرجان طبعا انا مش هتكلم ولا هنقد كتير عن الفيلم لاني ببساطه معرفش .. بس كل اللي عايز اقوله كلمتين عليه .. الاولي الفيلم طول ما انا قاعد قدامه وبعد ربعه تقريبا وبعد ما الخطوط العريضه للقصه بانت قدامك ..
قعدت مستني حدث ما يحصل ” مش عارف ايه هو ” انما قعدت مستني حاجه تحصل غير اللي حصلت … لكن مفيش حاجه حصلت وانا قاعد ومش مصدق واقول في عقل بالي ياواد اكيد حاجه هتحصل علشان الفيلم مينفعش يبقي كده وخلاص .. لكن للاسف نأبي طلع علي شونه (

 

الحاجه التانية اللي دايقتني ونرفذتني اوي هو مشهد في اول ربع ساعه في الفيلم .. المشهد لميرفت امين وهي بتلقي محاضرة في المدرج وتقول ” النهارده ياولاد هنعمل تجربة ديمقراطية صغيرة وهي ان كل واحد هيقول راييه فيه بصراحه

 

واول ما تقول كده كل الشباب اللي في المدرج يتخانقوا مع بعض .. الشاب الاسلامي يقولها ملابسك خليعه والشاب الممثل او الفنان يقوم يتخانق مع الاسلامي ويقوم الشخصية المعتدله اللي هي ابن مرجان يقولهم مينفعش كده وبيخلص المشهد علي ان الشباب مش عارفين يعيشوا التجربة الديموقراطية اللي انعمت بيها الست ميرفت امين

 

شايفين الفن تالموجه يارجاله

 

—

 

طاهر قبل ما ادخل الفيلم كان قايللي ان عادل إمام بيتريق علي ايمن نور في مشهد العيش لما بيدخل عادل امام برغيف عيش كبير
اوي ويقول هو ده العيش ابو شلن

 

طبعا هو ولا قاصد ايمن نور ولا حاجه واللي بيقوله طاهرتماحيك ” من وجهة نظري” المشهد ده تحس اصلا انه كله مقحم علي كله … يعني اصلا هو المفروض انه بيروح المجلس بعد ما السكرتير بتاعه قلله لازم تروح وتتكلم علشان اهالي الدايره يعرفوا انك بتروح وبتاع المشهد بيبتدي بواحد بيتكلم عن حوادث القطارات ولما بييجي دور عادل امام بيتكلم بقي في كل حاجه يخرج من القطارات علي العبارات علي العيش علي كله وطبعا بيتكلم بلسان الحكومة

 

—

 

طبعا بعد الذنب الفظيع اللي ارتكبته وهو دخولي فيلم مرجان … قلت ياواد كفر عن سيئاتك شوية

 

كنت عارف ان فيلم العطر أو the perfume

 

هيتعرض في مركز الثقافة السينمائية في وسط البلد يوم الاربع طبعا فيلم العطر من اهم الافلام اللي اتعملت في الفتره الاخيره يعني من تلت لخمس سنين

 

وده مش رايي انا بس

**الصورة اللي محطوطة وبدون ادني مبالغه من مشهد من اهم المشاهد اللي شافتها عنيا

المهم لما رحت ولقيتهم لسبب ما غيروا الفيلم وحطوا فيلم كشف حساب بتاع خالد ابو النجا ونور … الفيلم بجد ومن القلب للقلب زي الزفد اداء وحركة كاميرا وكله كله كله

 

خالد ابو النجا مطخنلي صوته قال يعني بيعمل كاركتر مختلف … بلا خيبه

 

احمد عبد الغني راخر بيتكلم كده بطبقه صوت غريبه اوي طول الفيلم

 

وكفاية علي الفيلم كلام اوي كده

أيوة بتستهبل وبتستهبل ونص … الحكاية بدأت لما عم شريف الفراخجي اللي في شارعنا قلب المحل بتاعه وسماه شريفكو فون للاتصالات وده طبعا كان بعد اللشركة الجديدة ما نزلت ” الاسم النبي حارصها وصاينها اتصالات

وكان فال وحش عالشارع كله … اصلي انتوا مش واخدين بالكوا الشارع فيه سيبرين ده غير الشبكات اللي خريجي دبلوم تجارة بيسترزقوا منها واهي سبوبة من هنا وتانية من هنا والحياه ماشية .. هي بتعرج اه بس ماشية هيعملوا ايه.. المهم بالنسبة لشركة إتصالات دي بقي

وزارة الاتصالات عامله معاهم عقود علشان ميرخصوش سعر الدقيقة علشان الشركتين التانيين … طب ايه اللي استفاده عم محمد البواب بتاعنا اللي بيروح يتكلم من السنترال … طب ما هي هي والشركة الجديده ولا زودت ولا نقصت ولا منافسه ولا بتنجال

طيب هي اصلا الوزارة ليه مش عايزة ترخص

طب في داهية الموبيلات خلينا في المصيبة التقيله النت

بعد ما قعد ييجي 3 سنين بـ150 جنيه رخصه وبقي 95 … وجي دلوقتي عايز يخليه محدود الساعات ياخي نااااا

طب بأمارة ايه الاتصالات في كل العالم تكون بترخص الا في مصر … هي الوزارة مستعبطه وسايقه الهبل عالشيطانه كده ليه

بجد يبقي حرام علينا لو سكتنا

لازم يكون فيه حاجه نحسسهم اننا موجودين وغاضبين من إستكرادنا … مش عارف ممكن نعمل ايه …بس ان شاء الله نقف بالروترات ونقول لا

 

لا للنت المحدود …. الســـرقــــة ليـــها حــدود

 

 

 

 

 

 

 

بسم الله الرحمن الرحيم
طالعنا خبر يوم 17/7/2007 بقرار وزير الإتصالات نص الخبر :-

 

اقتباس:

وافق مجلس إدارة جهاز تنظيم الاتصالات في اجتماعه أمس برئاسة الدكتور طارق كامل وزير الاتصالات على إطلاق أسعار خدمات الإنترنت فائق السرعة ADSL لسرعاته المختلفة مع تحديد طاقة التنزيل أو عدد الساعات للربط مع فتح المجال أمام الشركات لتقديم عروض مختلفة طبقاً لآليات السوق مع تحديد لسعر الخدمة بسعر 45 جنيه شهرياً كحد أقصى للخدمة بسرعة 256 ك بت/ثانية بدلا من 95 جنيه وقام مجلس إدارة الجهاز بتحديد طاقة التنزيل بطاقة تحميل 2 جيجا شهرياً أو تحديد عدد ساعات الربط حسب طلب المشترك ويحدد الإطار الجديد انه عند طلب المشترك طاقة تنزيل أو ساعات ربط إضافية يتم سداد المقابل الشهري الإضافي.ويأتي ذلك في إطار تحديث مبادرة الإنترنت فائق السرعة التي أطلقتها وزارة الاتصالات وتكنولوجيا المعلومات في سنة 2004 حيث يهدف هذا القرار إلى نشر خدمة الإنترنت فائق السرعة في جميع أنحاء الجمهورية والوصول بالخدمة إلى شريحة أكبر من المستخدمين مع القضاء على الوصلات غير القانونية Line Sharing التي يتم مدها من منزل لمنزل والتي تقلل من جودة الخدمة وتعوق انتشار الخدمات الجديدة مثل خدمات الصوت والصورة حيث أن خدمة ADSL ترتبط بخدمة خط التليفون وهو مخصص للعين المؤجرة ( الشقة الواحدة).وقد قامت وزارة الاتصالات وتكنولوجيا المعلومات والجهاز القومي لتنظيم الاتصالات بالاشتراك مع الشركة المصرية للاتصالات وشركات تقديم الخدمة في تحديد الإطار الجديد للخدمة بعد دراسة وضع السوق الحالي والأسعار الحالية مع الاسترشاد بإحصائيات عن أعداد المستخدمين وحجم استخدامهم للخدمة بالسرعات المختلفة.وأضاف الدكتور عمرو بدوي الرئيس التنفيذي للجهاز أن ذلك سيؤدى إلى تحسين مستوى الخدمة وتخفيض الأسعار بالنسبة لمختلف السرعات لتكون في متناول أكبر قدر ممكن من المواطنين حيث من المتوقع أن تقوم الشركات بتقديم عروض مبتكرة ومتنوعة تتناسب مع الاحتياجات المختلفة للمستخدمين من حيث عدد ساعات الربط أو طاقة التنزيل هذا ومن المتوقع أيضا أن يؤدي ذلك إلى زيادة أعداد مستخدمي الإنترنت في مصر والبالغ عددهم اليوم 6.8 مليون مستخدم مما سيعمل على توسيع قاعدة المستفيدين من الخدمات الجديدة التي تتطلب سرعات عالية كحد أدنى لتوصيل الخدمة. وأضاف الدكتور عمرو بدوى أن الجهاز يدعم هذا التخفيض من خلال صندوق الخدمة الشاملة بالتعاون مع الشركة المصرية للاتصالات وهو ما مكن الشركات العاملة في هذا المجال للوصول لهذا التخفيض والذي يقترب لنسبة أكثر من 50% بالنسبة لسرعة 256 ك/ب حيث كان السعر 95 جنيه شهرياً مع إطلاق حرية الشركات في تسعير باقي السرعات بسرعة 512 ك – 1 ميجا – 1.5 ميجا مع تحديد طاقة التنزيل بالنسبة لهذه السرعات أيضا كي تغطي احتياجات الأسرة الواحدة فقط دون توفير هذه الخدمة للمنازل أو الشقق المجاورة فيما كان يحدث عند عدم تحديد طاقة التنزيل. وفى هذا الصدد فإن سرعة 2 ميجا سوف يظل سعرها استرشاديا 760 جنيه شهريا بطاقة تنزيل مفتوحة حيث أنها مخصصة للشركات والمؤسسات.

لذا قررنا عمل حملة المليون خطاب لمحاولة بتعديل هذا القرار الظالم لجميع المصريين بجميع الفئات
وأن يكون هذا الخطاب موحد نص الخطاب :-

 

اقتباس:

بسم الله الرحمن الرحيم الي من يهمه الامر اما وبعد   اولا وقبل كل شئ نشكر سيادة وزير الوزراء الدكتور الفاضل احمد نظيف و وزير الاتصالات الدكتور طارق كامل علي اهتمامها بالبنية التحتية المعلوماتية في مصر ومجهوداتهما الرائعة في سبيل تطويرها والعمل علي نموها وذلك املا في مصر متقدمة مسايرة لنهضة العالم المتحضر   تردد في الفترة القصيرة الماضية علي الساحة المعلوماتية في مصر انباء بخصوص تخفيض اسعار خدمة الانترنت وانتظرنا ذلك التخفيض بشغف وتطلعنا اليه وذلك لعلمنا بتوجيهات سيادة الرئيس محمد حسني مبارك حماه الله لنا برعاية شباب مصر والاهتمام بهم   الي ان فوجئنا جميعا بما اعلن من قبل وزارة الاتصالات في يوم 18 يوليو لسنة 2007 بتخفيض اسعار الانترنت الي اكثر من 50% مع تحديد عدد ساعات الربط او تخفيض الحد الاقصي للتحميل الي 2 جيجا   اننا مستخدمي شبكة الانترنت في مصر نعلن اعتراضنا علي هذا القرار ايا كان الدوافع المؤدية الي اطلاق هذه المبادرة   هل نسير بخطي الي الامام ام نرجع الي الخلف هل نتقدم ام نتاخر في اتخاذ قراراتنا ان هذا التخفيض المزعوم ماهو الا تخفيض في الاسم فقط ولكن في مدلولوه واذا نظرنا له بنظرة اخري سنجد انه تخفيض كاذب وهذه الاسباب   1- النسبة الاكبر من مستخدمي الانترنت في مصر مشتركين بسرعه 256 ك ب /ث 2- 2 جيجا فقط حدا مسموحا للتحميل من الانترنت فاجئنا جميعا انه لحد ضئيل جدا 3-هذا الحد المسموح به للتحميل انه ليجعل مستخدمي الانترنت في مصر الي مرتادي شات فقط ومرتادي تصفح مواقع ليس اكثر خوفا من تعدية الحد المسموح بيه ودفع مبالغ اكثر قد توصف بانها خيالية ( 8 جنيه للجيجا الزائدة حسب اتصالنا بمعظم مزودي الخدمة في مصر وابلاغهم لنا بسعر الجيجا الزائد عن المسموح بيه ) 4-هل تعلمون سيادتكم ان متوسط استخدام معظم شباب مصر لايقل عن (20-30 جيجا شهريا) 5- هل تعلمون سيادتكم ان الانترنت في مصر ليس اداة شات ولا تصفح فقط وانما هو مقصد للتعليم ومقصد للترفيه ومقصد للمبرمجين ومصممي صفحات الوب وهذا مايحتاج الي حد اعلي من هذا 6- هل تعلمون ان هذا الحد المسموح بيه ( 2 جيجا ) احبطنا جميعا   نحن جميعا مقدرين لسبب هذه المبادرة وذلك لردع الinternet connection sharing ومن يستغلون الانترنت للكسب غير المشروع من خلال توصيل الشبكات الي المنازل المجاورة عبر الشبكات السلكية واللا سلكية ولكن سيدي انتم هكذا لستم فقط ستردعون هؤلاء الفئة ولكنم ستردعون جميع المستخدمين امثالنا من هما متتضرين من تلك المبادرة بالعكس قرراكم هذا فيه مصلحة شخصية لمن يسموا بكبار موئسسي تلك الشبكات ال internet connection sharing حيث انهم سيتجهون للانترنت بسرعه 2 ميجا وستزيد نسبة توزيعهم وشبكاتهم   ناسف للاطالة ولكن مانطلبه هو الابقاء علي ال unlimited internet packages الحالية حفظا لحقوقنا بالتمتع بخدمات الانترنت ومسايرة العصر ومواكبة تطوراتوا بالاضافة الي طرح تلك المبادرة وذلك توجها لتلك الفئة من هم من مستخدمي الشبكات المحظور انشاءها وهم بكل تاكيد سيجدون في تلك الباقة مايسرهم لانها افضل بكثير لهم من استخدام الشبكات هذه بما لها من عيوب جمة   نرجو سرعه التوضيح وتعديل القرار   شكرا لكم لرحابة صدركم

الإيميلات الموجه إليها هذا الخطاب
أولا وسائل الإعلام :-
جريدة الجمهورية eltahrir@eltahrir.net
أخبار اليوم akhbarelyom@akhbarelyom.org
بريد الجمعه: baridelgomaa@ahram.org.eg
برنامج العاشرة مساءً: al3ashera@dreams.tv
عمرو أديب alkaheraalyoum@orbit.net
أحمد رجب a_ragab@akhbarelyom.org
90 دقيقة 90min@elmehwar.tv
ثانياً : المسئولون :-
http://www.mcit.gov.eg/ar/Contactus.aspx
وزارة الإتصالات

 

جهاز تنظيم الاتصالات
بريد اليكترونى: info@tra.gov.eg
صفحة الشكوي
http://www.tra.gov.eg/arabic/Complain_Add.asp?Menu=4
التليفون: 155

 

السيد رئيس الوزراء الدكتور احمد نظيف لترفع الشكوي الي التقرير الذي يقدم له شهريا
questions@cabinet.gov.eg

 

الموزعون :-

 

شركة Tedata احد اكبر مزودي الخدمة
ارسل الرسالة عن طريق
http://tedata.net/ContactUs.htm

 

شركة لينك دوت نت احد اكبر مزودي الخدمة
http://www.linkdsl.com/LinkDSL_Code/…dbackForm.aspx
Call center : ( 16333 )

 

شركة سوفيكوم احد كبري الشركات المزودة للخدمة
E-mail: support@soficom.com.eg

 Call center : ( 19256 )

 

ملحوظه**** الدعوة دعوة رسمية اوي واللي شايف ان وزارة التصالات ووزيرها ورئيس الوزرا مايستاهلش الكلام ده هو حر وممكن يعمل صيغه تانية … الحقيقه دي الصيغه اللي لقيتها متوفرة

 

 

 

 

 

دعوة

اتشرف بدعوتكم لحفلتى القادمة بساقية الصاوى بالزمالك قاعة الحكمة فى يوم الثلاثاء24 يوليو …………..فيروز كراوية

سعر التذكرة: 15 جنيه.

الشعراء: احمد الفخرانى- احمد حداد- اياد ابو بكر- محمود عزت-

عمر طاهر.

الملحنون: عمرو جاهين- محمد عبد الله- شريف الوسيمى- محمد رمزى- عمر الرخاوى.

فريق التنفيذ و التوزيع الموسيقى: عمرو جاهين- محمد عبد الله-

هانى بدير- احمد امين.

فيروز كراوية

إمبارح كان عرض للافلام اللي من ضمنهم فيلم تنهيدة … كان العرض التالت للفيلم .. الاولي كانت في نقابة الصحفيين والتاني كان في الاوبرا .. الحقيقة العرض ده اتبصطت منه اوي .. وخصوصا ان معظم اللي كانوا موجودين كانوا يعرفوا بعض … فكان عرض فني لناس همه أصلا أصدقاء .. فخلي الموضوع يكون فيه شيء البتاااااع … فاهمني طبعا

كان فيه مدونين عزاز اوي منورين المكان .. عيد وطاهر وأسد ووائل

وطبعا شباب الغد بلال ويوسف وشادي وغيرهم واللي لسه شغالين بالعند في كل التحديات اللي واقفه قدامهم

تغطية ———–

 

في حزب الغد يوم الخميس 19/7 كانت أمسية فنية عرض بها أفلام فريق ون شوت الفني

 

وكان ذلك العرض ضمن حملة تعالوا شوفوا أفلامنا التي ينظمها فريق ون شوت والتي تهدف الي عرض الاعمال المنتجه من خلال الفريق في كل مكان يتيح عرض الاعمال الفنية به

فبعد العرض الضخم الذي نظمه الفريق في 28/6 الماضي في نقابة الصحفيين والتي فردت له الصحف والمجالات صفحات وأخبار عنه

يأتي عرض في مكان أخر … حيث القاهره الحقيقة بشوراعها وميداينها … فقد عرضت الافلام بقلب القاهرة … ميدان طلعت حرب وبالتحديد في مكان إتفق أو إختلف معه ولكن لا احد يستطيع إنكار تأثيره في الحياه المصرية في الفترة الاخير …وهو حزب الغد

 

وتم عرض ثلاثة أفلام وهي…

 

لقمة عيش       إخراج سمير عِشرة

تنهيدة             إخراج محمود صابر

ويوتوبيا          إخراج سمير عِِشرة

 

 

 

وتلي عرض الافلام ندوة كانت اقرب الي دردشة من القلب أبدي الجميع فيها سعادته الغامرة بالأفلام المعروضه وأبدو أيضا إعجابهم الشديد بفكرة ون شوت وقد تحدث كل مخرج عن ظروف إنتاجه لتجاربه وخططه المستقبلية

وترامت أطراف الحوار من هنا الي هناك … فن وسياسة وأدب وحال الدنيا وغيره وغيره وغيره

 

 

 

وإليكم بعض الصور

 

 

 

 

 

 

 

 

للتواصل مع بتوع ون شوت إشتركوا في الجروب أو فوتوا عالموقع

 

 

 

 

تعالو شوفوا أفلامنا في حزب الغد

يوم الخميس 19/7 في حزب الغد بميدان طلعت حرب أعلي جروبي

ويعرض…
لقمة عيش إخراج سمير عشرة ومدته 4 دقائق

تنهيدة إخراج محمود صابر ومدته 14 دقيقة

يوتوبيا إخراج سمير عشرة ومدته 7 دقائق

حزب الغد فوق جروبي ميدان طلعت حرب

والعرض ضمن حملتين الأولي لحزب الغد وهي

فن أولادنا لأهل بلادنا

والثانية إفتكاسة ون شوتاوية وهي

تعالوا شوفوا افلامنا

في إنتظاركم

 

 

 

 

 

صديق عزيز شاهدت مدونته مؤخرا وهو حسن أرابيسك

صاحب مدونة فضفض

طبعا المدونة حلوة اوي واحلي ما فيها انك وانت داخل تحس انك داخل معرض متنوع لفنون مختلفه لوحات وشعر وغيره

في ابيات شعر قريتها وأثرت فيا اوي

بس الحقيقة جه في دماغي سؤال كده مش بخصوص الشعر المكتوب لكن بخصوص اسم المدونة

هو احنا فعلا محتاجين نفضفض او صح اننا نفضفض

طب هي الفضفضة دي حاجه صح

مش عارف ساعات ببقي متأكد ان الفضفضه حاجه كده بتريح وفي بعض الاوقات غلط اننا نفضفض علشان غلط اننا اصلا نرتاح

ممكن يكون مشكلتنا في ال27 سنه اللي فاتت انا كنا بنفضفض!!!

طب ما نجرب ومانفضفضش … مش يمكن نتغاظ ونشيل في قلبنا ” علل ” ونجز علي سنانا ونقفل ايدينا … يقوم هوووووبا الدم يغلي في نفوخنا … فنترنفذ ونعمل حاجه ما في وقت ما للبلد واهلها وناسها ؟

مش عارف برضه… لكن اكيد احنا محتاجين نترنفذ ونتغاظ … ومنفرغش شحنتنا دي الا لما نلاقي حل

اللهم ما نرفذنا يارب … وغيظنا … وخلينا نغضب !!!

 

 

حفلة جميزة يوم الاحد 15 يوليو2007 بنقابة الصحفيين وذلك فى تمام الثامنة والنصف والدعوة عامة للجميع

 

هتيجي وهتسمتمتع بأحلي أغاني هتقدمها فرقة الجميزة
أكيد مش محتاجين اقولكو ان نقابة الصحفيين 3 ش عبد الخالق ثروت وعلي بعد أمتار من محطة جمال عبد الناصر … قصدي الاسعاف

أشوفك هنااااااااك

 

 

 

يوم الحفلة بتاعة ون شوت اللي فاتت صديق عزيز ليا جالي … هو كبير حبتين … وقبل ما الحفلة تبدأ قاللي انتوا هتبدأو بإيه .. قولتله مزيكا هادية وبعد كده هنشغل الافلام … قاللي اومال مش هتشغلوا النشيد الوطني … ضحكت اوي .. وأفتكرته بيهزر … وعدي اليوم ..المهم .. بعدها قابلني تاني وقاللي احنا علي أيامنا كان كل تجمع في ناس حفلة اوي غيره …كان لازم نشغل النشيد الوطني والناس كلها تقف بعد كده نبدأ الحفلة … وانتوا المفروض تعملوا كده!!!!!!!

——–

صديقي العزيز الذاكرة مساعداه شوية …بس همه كانوا بيعملوا كده في النشيد الحالي ولا اللي قبله ؟

يعني من حوالي 27 سنه

طب ايه اللي خلي الناس تنسي .. او تحب انها تنسي تشغل النشيد الوطني

طيب بلاش … فيه حد مننا جسمه بيقشعر او بيحس اي احساس لما النشيد الوطني بيشتغل حتي في الماتشات بتاعة الكرة ؟؟

طب العيب في الاحساس ولا النشيد… ما اهو برضه الحق يتقال النشيد الوطني بتاعنا مايع اوي ولا فيه روح ولتا احساس حقيقي ولا غيره … او علي الاقل في وجه نظري

فاكرين اللي قابله كان فيه حماس ازاي ؟؟

والله زمان ياسلاحي … إشتقتلك في كفاحي

 

————

طب … في حوار بين ابن وابوه … الواد قال لابوه انت لازم تكون بتحب مصر ولو مكنتش يبقي ملكش حق … انما انا لو مبحبش مصر يبقي ليا حق

مصر علمتك يابا لما كنت محتاج العلام ..وقالولك العلم زي الميا والهوا … بس معلمتنيش انا …مصر عالجتك لما عييت … لكن معالجتنيش …مصر عينتك لما اتخرجت … لكن مصر معينتنيش

الحب بيبي شعور متبادل … مينفعش احب حد مبحبنيش … لازم احس بحبها علشان انا كمان احبها

—

اهو ده مثال لواحد مش شايف انه فرض عليه انه يحب مصر .. وباالتالي شايف انه مش واجب عليه انه يقوم يقف لما النشيد الوطني يشتغل

—

طب لو كان حصل وشغلنا النشيد الوطني قبل فقرات الحفل .. ياتري الناس كانت هتقف لوحدها ولا هنقلهم من فضلكوا قوموا اقفوا علشان النشيد الوطني؟! … وياتري في كم واحد هيتقبل وكم واحد هيرفض وكم واحد هيسخر ؟!