وعلي راي ظاظا فظاظا فالماده خمسه ونص من دستور الحياه اللي بتنص في النص المنصوص علي ان كل نص لازم يبقاله نص يحبه ويخاف عليه ويقاسمه الحوة والمرة بالنص

عم امين اتكل علي الله وسمع كلام ظاظا فظاظا واتجوز .. بعد سنه من الجواز بطل السجاير .. مش علشان حرام ولا بتسبب الوفاه .. لكن علشان عماله تغلي وهو مكنش ملاحق علي المصاريف وخصوصا ان الجماعة بتاعته كانت حامل

بعد خمس سنين عم امينقاعد بيتفرج علي الجزيرة عند جاره اللي متجوزش لقي ان الحكومة قابضه علي مش عارف كم من الاخوان .. راح البيت وبص في المرايا لقي دقنه تقيله نزل جاب موس وحلقها .. اصله كان خايف ينزل عند عم بكر الحلاق .. اصلي ياقة القميص ” ايحت ” اكمني مجابش ولا قميص من ساعة ما اتجوز .. اهو المصاريف بتغلي والمهية اللي بيخادها من المصلحه اللي جاب وسطه عشان يتعين فيها مبقتش تكفي

بعد عشر سنين عم امين مقدرش يمسك دموعه لما البيت بنته قالتله انا مش هقدر اروح المدرسة الا لما تجيبلي ” جزمه جديدة ” علشان العيال في المدرسة بيتريقوا عليها .. عم امين قال يعني ياربي المصاريف والدنيا والاكل والشرب وكمان العيال الصغيرة بتتريق ومش راحمه البت … عم امين معيطش من فراغ … اصله كان لسه يادوبك دافع فاتورة التليفون .. اللي جاتله مبلغ وقدره مع انه قافله بالقفل ومحدش بستعمله الي في الشديد الاوي … عم محمد الجرنالجي اللي جنبيه قاله ان السبب في كده .. انهم قال ايه باعو الشركة لمستثمر اجنبي … عم امين مستحملش وراح كسر التليفون بعصاية الغليه

بعد خمستاشر سنه .. وبناته داخلين علي جواز .. اتعرض عليه رشوة كبيرة اوي ” في نظره ” في المصلحه اللي بيشتغل فيها وصلت عشر تلاف جنيه .. رزمة واحده ورق من ابو ميتينات… بس عم امين مرضيش .. مش عشان ربنا ولا حرام .. بس عشان خاف من السجن .. وقال ان محدش قد الحكومة ..

بعد عشرين سنه .. جه عريس لبنت من بناته .. وطبعا عم امين مكنش معاه فلوس يجهز .. البيت اضطرت تشتغل في محل في وسط البلد … كان محل ملابس رجالي … بس ابن صاحب المحل اللي بيوقف فيه .. وعم امين كان عارف انه واد لون كده وبتاع حوارات .. بس كبر دماغه او استعبط .. برضه سترة البنات حلوة

وفي بداية يوم زي كل بداية يوم نزل عم امين وزي ما اتعود راح المصلحه ورحع الساعه اتنين ونص بالظبط واتغدي وقالله ساعتين وقام … مراته تقولله عايزين نغير الانبوبه .. يحركلها راسه هزتين تفيدها بكلمة حاضر …تقوله علي مصاريف مدارس العيال الصغيرة يحركلها راسه حركتين تفيدها بكمة حاضر .. تقوله علي ايجار البيت وقسط الدش وفاتورة التليفون وغيره .. برضه يهزلها راسه هزتين تفيدها بكلمة حاضر …. حاضر بقي او امري لله مش هي دي القضيه .. القضيه انه …. ما انتوا عارفين .. هو انا يعني اللي هقولكوا …

فجأه عم امين بص في الساعه لقاها اتنين .. ايه ده .. الساعه اتنين الصبح والبيت لسمه ماجاتش .. شغل ايه ده اللي يقعد للساعه اتنين

انا هنزل ادور عليها … مراته تقوله .. يهديك .. يعفيك .. يرضيك .. وحياه العيش .. عم امين ميرضش ..وحياة الملح .. عم امين برضه ميردش .. وحياه اللي اتقال .. عم امين مرضش .. مراته دمعت وقالتله .. طب وحياة اللي ماتقالش.. عم امين بصلها ومفهمش

قالتله طب وحياة اللي اتعاش .. وبدأت في العياط .. عم امين كمان دموعه نزلت… قالتله طب وحياة اللي ماتعش ياعم امين .. عم امين كسر صمته وقالها .. مبقاش فيه وقت علشان نعيش اللي ماتعش .. خلاص حياتنا يقت ذكري

نزل ومشي في الشوارع زي المجنون يدور علي ميكروباص ينزله وسط البلد .. فين وفين لما لقاه ..

مشي في وسط البلد نحية المحل اللي شغاله فيه بنته .. وهو ماشي ظابط وقفه .. قالله ايه اللي منزلك الساعادي .. قاله ياباشا نازل ادور علي بنتي .. قاله انت مش عارف ان البلد مقلوبه .. قالله ليه … قام الظابط قالله انت مسمعتش عن الإشاعه.. قاله اشاعه ايه .. الظابط راح قالله ايييييوه .. انت عايز تعرفها علشان تمشي وتفضل تقولها .. وتكدر الامن العام .. وراح نادي بصوووت عالي ..وقال خدوه عالبوكس

عم امين طلع البوكس وشاف بنته ماشيه من غير الاشرب اللي نازله بيه من بيتها .. مع واحد ميعرفوش .. مهواش خطيبها ولا هو صاحب الشغل .. ابتسملها وقالها .. كانت ليله فل .. وطبق خمسينه وحطها في اتول بلوزتها .. وابتسمتله بنت عم امين

عم امين عيط .. بس من غير دموع .. قال اااااااه .. بس من غير صوت .. طلب عزرائيل .. بس من غير ما يتمني الموت

عم امين اتحبس اربع تيام واهله مكانوش يعرفوا عنه حاجه

لكن لما خرج .. خرج مش زي ما دخل .. خاف يرجع البيت وخاف ميرجعش .. خاف يعض في البلد .. وكمان خاف من الغربه

لغاية هنا .. وانا مش عارف عم امين المفروض يعمل ايه ؟؟

تفتكروا يعمل ايه ؟؟! .. ..

يظهر ان حماده عزو وقضية راي عام ونقطة نظام .. مش هما بس مسلسلات رمضان

لان النهارده شفت حلقة جديدة من مسلسل الغلاء اللي بتقدمهولنا طول السنه الحوكة ..ز وطبعا بيدفع تكاليف انتاجه الناس … اللي هو انا وانت يعني

خارج من البيت في أمان الله علشان اركب الميني باص اللي مجهزله فكه بريزة مخصوص لانه سعره بقي بجنيه وبريزة لقيت ان الورقه اتغيرت بدل ماكان مكتوب عليها ” أجرة موحده 01.10 بقي مكتوب عليها أجرة موحده برضه بس 01.60

والظاهر انهم استحلوا حكاية عناء الناس من عدم توافر البريزة وإستغنائهم عن باقي الربع جنيه فلما غلوا التذكرة حافظوا علي تواجد البريزة برضه

وطبعا اي زياده في الاسعار ممكن الواحد يقبلها لو كانت مستحقه .. لكن ده لو كانت زيادة ..انما انا عمري ما سمعت في حياتي ان فيه زيادة للاسعار توصل حوالي خمسين في الميه.. زي المترو ماغلي كده بااكتر من تلاتين في الميه.. دي مش زياده .. ده اسمه استعباط .. استهبال .. اي حاجه تانية غير انه زيادة اسعار

يعني الناس لسه ما فاقتش من المدارس ورمضان ولسه الكحك علشان العيد الصغير .. كل سنه وانتوا طيبين … يلاقوا الموصلات تغلي … اينعم الشركة صاحبة الميني باص اللي ركبته شركة خاصه .. لكنت اظن دور وزارة الموصالات هو تنظيم الموضوع مش كل صاحب شركة يغلي براحته وبمزاجه وخاصةً ان الشركات المتواجدة العربيات بتاعتها في الشارع المصري بقت لا تعد ولا تحصي .. اشي شركة لبنان .. واشي الوهاب واشي سيارات عبده العامة..

طبعا علشان الغلو في تمن التذكرة لسه جديد .. فلما دخلت لقيت باب الميني باص اتقفل .. والشباك اللي جنبي لقيته مقفول برضه .. جيت افتحه .. لقيت السواق بيقللي التكييف يا استاذ .. بصيت له كده وبصيت لا ايديه اللي بتشاور علي اخر العربية … الاقي خير اللهم ما اجعله خير فيه تلت فتحات والمفروض انهم تبع التكييف … قلت في سري الناس عندهم ضمير برضه وعايزين بستحللوا السرقه

كل سنه وانتوا طيبين ..والسنه اللي جاية .. مصر تبقي احلي ان شاء الله

 رمضان كريييييييييييييييييم

تحديث —

تم اعلان الجوايز من مده قليله .. وهي علي حسب ما وصلتلي من سمير بالتليفون ان جايزة الفيلم الروائي راحت لفيلم ازرق واحمر وجايزة الفيلم التسجيلي راحت لفيلم انا مضايقك ؟. وفيلم حلم اسطبل عنتر خد شهادة تقدير

الف مبروك للفايزين وبالتوفيق دايما .. ومبروك علي كل اللي شاركوا في اول مسابقه ديجتال لمهرجان الاسكندرية

————

ده تالت موضوع ” وغالبا اخر موضوع ” اكتبه عن المهرجان..

امبارح حصل مؤتمر صحفي في اسكندرية وقالوا فيه ان هي فوضي موصلش لاسكندرية والسبب في ده المنتج

طبعا مش غلط ان المنتج يفضل ان الفيلم يكون العرض الاول ليه في مهرجان فينيسيا واللي بيعتبر تالت اهم مهرجان في العالم تقريبا .. لكن الغلط انه يعشم ادارة مهرجان اسكندرية ان الفيلم هيتعرض عندهم فإدارة المهرجان تخرم للحلق ودانها وتعتمد عليه في ان يكون هو ده اللي يميز حفل الختام وقبل الختام بيوم .. فين الفيلم .. مفيش فيلم.. واكن الموضوع اتفاق شله عالقهوة .. طبعا انا لغاية دلوقتي معرفش التبرير الحقيقي اللي طلع بيه المنتج او رئيس المهرجان .. وجطبعا عشان ابقي حيادي هو فيه سيناريو تاني للموضوع .. والسيناريو ده هو ان اصلا لم يتم الاتفاق مع المنتج علي اي حاجه .. وادارة المهرجان قصدت تطلع تصريحات ملهاش اي اساس من الواقع علشان تعمل بروبجاندا .. بس بروبجاندا كدابه

المهم … النهارده الختام هيتذاع علي التانية او الفضائية وهيكون فيه تسليم الجوايز من اوبرا الاسكندرية … مسرح سيد درويش وهيكون فيه تسليم الجوايز للفايزين .. وبالنسبة للمسابقة الديجتال .. ففي تلت جوايز زي ما قلنا قبل كده … الجايزة الاولي جايزة الفيلم التسجيلي .. والجايزة التانية جايزة الفيلم الروائي االقصير .. والجايزة التالته جايزة لجنه التحكيم .. وبنتمني ان فيلم يوتوبيا الون شوتاوي ياخد الجايزة التانية او التالته ..واكيد كويس انه شارك مشاركه ملحوظه جدا

وصلت امبارح الحد من اليكس حوالي الساعه 3 بعد منتصف ليل الاتنين بعد يومين جمال في اسكندرية حاولت اني اعمل فيهم كل اللي اقدر اعمله

فلاش باك –

المكان : مبني الاهرام القديم في شارع الجلاء بالقرب من محطه الاسعاف

الزمان : قبل حفلة ون شوت التانية بتاعة نقابة الصحفيين

الحدث : انا وعِشرة بنشرب الشاي مع أ-نادر عدلي رئيس قسم السينما في الاهرام والناقد ضياء حسني

اتكلمنا في السينما الديجتال وسوق الديجتال والافلام المستقلة فعلا والمستقلة كده وكده .. واللي داخل الموضوع سبوبه او بحث عن فاند من غير سبب او مرض “ياحرام” نفسي .. الكلام خدنا للمهرجانات اللي بتدعم الديجتال وجت سيرة مهرجان القاهره مثلاوازاي السنه اللي فاتت عملوا فيه قسم ديجتال .. ومهرجان الاسماعليه .. ولما جت سيرة مهرجان الاسكندرية .. طبعا المهرجان دولي ” دول حوض البحر المتوسط “ولو فيه قسم للديجتال ” حتي لو مصري بس ” هيكون شيء ايجابي ويتحسب للقائمين عليه وأ-نادر بعد ما قال الفكرة نوي ان الموضوع هيتعرض علي ممدوح الليثي بصفته رئيس الجمعية المصرية لنقاد وكتاب السينما وهي الجهة المنظمة للقسم الديجتال في المهرجان

بعد كده جمعنا لقاء مع أستاذ ممدوح الليثي في مكتبه في مدينة السينما لكن مخدناش الكلام للموضوع ده

بعد ايام قليله الموضوع لقيتوا فعلا علي ارض الواقع و قد كان

—–الفلاش باك خلص

مثل ون شوت في المهرجان فيلم يوتوبيا الفيلم بيمثل ون شوت بصورة كويسة جدا مع تصنيفه الروائي ومدته 7 دقايق ..بس سبع دقايق فيهم السكسافين كله ..الفيلم زي باقي الافلام الديجتال اتعرض في المركز الثقافي الفرنسي وكان موجود أ-نادر عدلي

وأ-ممدوح الليثي وغيرهم .. وكان الجمهور لطيف

من ضمن الفلام اللي اتعرض في التصنيف التسجيلي كان فيلم حلم إٍسطبل عنتر.

حلم أسطبل عنتر من الافلام القليلة اللي تقدر تصنفه كتسجيلي غير ممل .. اي فيلم تسجيلي مخرجه بيكون في تحدي كبير جدا لما يتعد العشر دقايق الاولي لان اي متفرج بيحس بالزهق .. لكن تامر عزت عمل ده في فيلم مكان اسمه الوطن .. والفيلم مع انه حوالي ساعه وتسجيلي لكن مش هيصاحبك اي احساس بالملل وانت بتتفرج عليه .. ويمكن المخرجين التسجيليين الصغيرين عليهم عاتق كبير وهو تغيير الصورة المرسومه للفيلم التسجيلي عند كتير من المصريين ” افلام القناه التالته وما شابه ” لكن المقلق والمستفذ ان فيه شباب صغيرين بيصنفوا نفسهم انهم حامين حمي السينما المستقله ذات الرؤيه المغايرة المتمرده وبيعملوا افلام تسجيليه بنفس الطريقه واكنك بتتفرج علي برنامج عالم الحيوان

حلم اسطبل عنتر ومكان اسمه الوطن وغيرهم من الافلام التسجيليه اللي مش هتحس بالملل وانت بتتفرج عليها ممكن يكون السبب راجع ان المخرجين سواء تامر او يوسف حبوا يعملوا حاله درامية ما في الفيلم

نرجع لفيلم حلم اسطبل عنتر.. من ضمن الكلام اللي بيتقال علي لسان احد ساكني المكان ده ..حكاية عن طفل نشف من الكهربا وهو بيطير طيارته الورق اللعبه لانها بكل بساطه كان فوقه سلك كهربا ضغط عالي

الفيلم فيه استريسات تانية كتير علي حاجات ممكن جسمك يقشعر لما تعرف انها حياه يومية ومعناه يومية لكتير من الناس حظهم جمعهم في مكان زي ده

من وجهة نظري الفثيلم يستحق جايزة الفيلم التسجيلي زي ما يوتبيا يستحق جايزة الفيلم الروائي

الا اذا كانت فيه مقاييس اخري……

 live from alex

وصلت اسكندرية من حوالي ساعه ونص…الله يسلمكو:)  .. اول ما وصلت سبت الشنط في الفندق وبتاع وبعد كده نزلت اتمشيت عالبحر لغاية مكتبة الاسكندرية اللي بكتب التحديث ده منها بصراحه دي اول مره اجيها وادخلها .. وبصرف النظر عن ان منظها مبهر لاي عيون تشوفه .. فالمكتبه فعلا فيها كمية من الكتب اللي مش هتلاقيها في اي مكان تاني … واللي اهم من الكتب انك هتلاقي كل اللي انت عايزه بمنتهي السهولة اللي في الدنيا .

تاريخي في المكتبات العامة مش لطيف .. لاني كنت بتنرفذ اوي لما بلاقي حد بيتصرف باسلوب مش مقبول .. يعلي حسه .. او غيره لكن في الاسكندرية الموضع مقبول جدا .. وبجد مرتاح نفسيا وانت موجود في المكان ..

كمان شوية هروح عشان اقبل باقي الناس اللي متفق معاهم عشان نحضر مهرجان الاسكندرية ..ومستهيئلي كده هعمل تحديث تاني من مكان تاني .. الله اعلم ….

مكتبة الاسكندرية 04.07 العصر .. بالتوقيت الجديد    

اسكندرية احسن ناس .. عالبحر ماشية تتمختر ..من سيدي بشر لأبو العباس .. أيووووه ياعالم عالمنظر
ايووووه ياعالم عالمين..ا والشوق بيتمرجح بينا.. وتلتيمية الف سفينة عالبحر ماشية بتززمر.. يااعظم حي الجدعان حي العرايس والعرسان محروسه من الانس ومن الجان.. ياحلوة ياام التوب الاخضر

كفاية غني بقي:)

مروحتش اسكندرية الا مرات قليلة يمكن مرة او اتنين .. لما فيلم يوتوبيا بتاع سمير اتقبل فرحت اوي .. طبعا عشان اتقبل وهيمثل ون شوت في المهرجان بصرف النظر عن انه هياخد جايزة ولا لا .. لكن الحقيقة ان هيبقي فيه سبب اروح اسكندرية .. وتلكيكة مناسبة ..والوقت كمان لطيف واكيد مش هتبقي زحمه… وغير كده ده هيبقي اخر ويك اند قبل رمضان كل سنه وانتوا طيبين ودعواتكوا بقي ليوتبيا .. طبعا انتوا عارفين انه هيتعرض يوم السبت الساعه خمسه ” بالتوقيت الشتوي الجديد ” في المركز الثقافي الفرنسي بالاسكندرية في شارع النبي دانيال في محطة الرمل ..

اشوفكم هناك

انها عودة كغيرها من العودات

ظلام دامس مقترن بهدوء مقلق يكسره صوت اوراق الشجر الصفراء وهي تتطير علي الارض ،تطير في أسراب وكأنها إشارات الاهية متتاليه لأحد الاشخاص من هو ..وأين هو .. لا أعرف ..ربما كان ناظرا من شباكه بعد أداء مهامه الجنسية علي الوجه الاتم ..ولو كان هذا الوجه الاتم في نظره فقط !!

نقاط من السماء تتساقط علي رأسي لتعزف لحنا قريبا من أذني أعرفه جيدا … ولكني لا أتذكره … احاول في تذكره …وأفشل … انظر الي السماء فأجد مبرد هوائي مصدر هذه النقاط أسئله يعيني عن إسم هذا اللحن ولكنه يكتفي أيضا بالنظر الي دون إجابة

كثيرة هي العودات .. عوده بعد غياب أشتاق فيه الي الجميع الي شبشبي أبو صباع الذي لا أستطيع الحياه بدونه .. أشتقت الي أصدقائي وأحبائي .. ولكن عزائي عدة أشياء منها…

نجاح عروض ون شوت في مرسي مطروح

جدير بالذكر ان في شهر أغسطس كثيرا ما تغلق المراكز الثقافية في القاهرة أبوابها فأتجهت ون شوت بأفلامها لتستكمل حملة تعالوا شوفوا أفلامنا التي تهدف الي عرض الافلام في كل مكان يتيح عرض الافلام به

وتم عرض الافلام في أكثر من معسكر شبابي وأكثر ما أسعدني في هذه اللقاءات هو التفاعل الجميل من قبل شباب المعسكرات وما أسعدني أكثر هو معرفة البعض وسماعه عن ون شوت كحاله جديدة في السينما البديلة او السينما الديجتال

فيلم الجزيرة الوثائقي عن السينما المصرية

مما أسعدني أيضا في الايام القليله الماضية هو فيلم الجزيرة الوثائقي الذي تناول السينما المصرية في مائة عام مع محاولة ملحوظة من قبل القائمين عليه بالمرور علي اهم محطات السينما المصرية .. ثم إنتهي الفيلم بالامل الجديد في السينما علي حد وصف المتحدثين فيه …وكان هذا الامل هو افلام جماعة ون شوت .. تنهيدة لمحمود صابر وسراب ويتوبيا لسمير عِشرة

تمثيل يوتوبيا لجماعة ون شوت في مهرجان الاسكندرية السينمائي الدولي

كان سببا لسعادتي أيضا هو خبر مشاركة يوتوبيا في مهرجان الاسكندرية السينمائي الدولي الذي تنظمة وزارة الثقافة ضمن عشرين فيلم ديجتالل فقط .. 13 منهم روائي … منافسه قوية ومشاركة مستحقه وتمثيل جدير به يتوبيا لجماعة ون شوت

هذا بخلاف اني سأقضي الاجازة الاسبوعية القادمة في الاسكندرية لحضور عرض يوتوبيا في المركز الثقافي الفرنسي بالاسكندرية يوم السبت القادم الساعه 5

رجل محمد عادل

لا اعلم … ربما هي إستجابه لدعاء الملايين من البشر .. ربما

أدعوا له بالشفاء وخاصة ان من اهم اسباب عودتي هو مساعدتي في احدي المشاكل التي واجهتني في نظام تشغيل المدونة

بصرفة النظر عن بعض التصرفات … اقصد كل التصرفات الغريبه التي تنصدر عنه .. ولكنه —واد غلبان اوي وجدع

وشكر الي كل من سئل وتسائل عني