الدويقة وبقاء بعض الاموات تحت الأنقاض لمدة تزيد عن اسبوع

وتهديد أهالي أسطبل عنتر بنسف الطريق الدائري

والعجز في توفير مساكن لهم

وخطف السياح من حوالي اسبوع ومعرفة الخبر من الإعلام الاجنبي قبل الاعلام المصري!

ومن قبل حريق مجلس الشوري في مشهد كوميدي.

كل ده مكانش اكتر من زيادة تأكيد علي الفشل والمصير المظلم الي مستنينيا في ظل حكومات الوطني وحكم مبارك

 زي ما واحد صاحبي قاللي .. المادة المخفية من برنامج الرئيس الإنتخابي هي كارثة لكل مواطن

ربنا يستر بقي

طب انا راضي ذمتكوا وذمة اي مواطن مصري او أمريكي او مزدوج الجنسية تعدي من العمر خمس سنوات ..لو ساقك القدر انك تروح أمريكا .. وكمل سواقه بيك علي ولاية في نص أمريكا أسمها نبراسكا .. واول ليله توصل فيها الولايه دي .. في نفس ذات اليوم يعني .. وانت ماشي في البلد الهادية واللي ترمي فيها الدبوس .. يعمل ترنرنرن .. وتسمع صداه عشر مرات
تقوم خير اللهم ما اجعله خير .. تلاقي زحمه كده وناس جايه عليك بتجري .. واللي علي هدومه دم .. واللي ماسك سكينه .. واللي بيدخل إيديه في وشك وانت مش فاهم هو بيقول ايه .. بس هو بيزعق …واكنك فجأه بقيت جوه لعبه من لعب هاوس اوف بلود ولا حاجه .. بدون ادني تهويل !
تعمل ايه .. وانطباعك هيكون عن البلد دي واهلها وناسها ايه ؟!
ستر ربنا ان الموقف ده لما حصل .. كان معايا صديق من جامعة نبراسكا .. وهو اللي حاول يفهمنا ان الليله دي زي ليله عيد معين عندهم ..
بس اعتقد ان لو ” لوك ” صديقي اللي من جامعة نبراسكا .. مكانش موجود معايا.. اكيد كنت هشاور لأي تاكسي رايح المطار واقعد هناك لغاية معاد الطيارة بدل مدينة الأشباح دي !
الغريب بقي بعد ما فهمت وتأكدت إنهم بيهرجوا .. وناس رايقه وفايقه .. قولت ياواد القط كام صورة .. ولما روّحت وشوفت الصور .. بصراحه لقيت صورة متطمنش .. فيها ظاهر حاجات غريبه .. قلت ياواد صدق ان دي كشافات النور ولما ضربت في الكاميرا .. عملت المنظر ده .. بصراحه قلت اصدق احسن عشان اعرف انام ..

وطبعا مش محتاج اني احلفلكوا ان الصورة مش داخل فيها اي تعديلات .. انا معنديش حاليا اي سوفت وير لتعديل الصور اصلا

النهارده لفيت في البلد شوية .. وانت ماشي في كل اركان البلد .. مش هتلاقي حد ماشي علي رجليه .. ولا حتي هتلاقي تكسيات .. لان الطبيعي ان كل الناس عندها بيوت .. وكل الناس عندها عربيات .. وكل الناس عندها شغل ” سبحان الله ” ومعدل الجريمة منخفض لدرجة انه في سنه كامله ميزيدش عن اربعه او خمسه جرايم !
سامعك ياللي بتقول زي عندنا في مصر بالمللّي
بس بقي بلا مصر بلا ميكانيكا فاضية .. انا حالف عالتلت كتب إني مش هعقد اي مقارنات وادخَل فيها مصر .. مصر فوق اي مقارنات يارجاله

كل ما نهدَي .. ييجي واحد من مشايخ الخير والبركية .. وييجي بالموتيسكل الجاوا بتاعه .. ويروح رامي قنبله علي ناس بتفكر !

هو دا بالظبط اللي عمله الشيخ  .. بس قنيلته غير القنبله اللي بتطلع نار .. لكن بتقتل برضه .. ويمكن كمان تكون اكتر خطر

يعني ايه فضيلة اللامؤخذه شيخ .. يقولك الصحفيين اللي بتتكلم عن المشايخ فسقه ولازم يتجلدوا !!

ساعدتك عايش في غياهب القرون المتخلفة يابشمهندس!

علي كده بقي .. انا وناس تانية كتير مهددين .. بالجلد .. ومش بس كده .. تعريض حياتنا للخطر .. بسبب التخاريف دي !

الساده الماحمين .. ومسئولي المنظمات .. متشوفلنا سكة قانوينة نقاضي بيها الناس دي .. هو ده مش تحريض برضه ولا انا بخطرف !

يامعالي الشيخ صح النوم .. وركز كده في اللي بتقوله .. علشان فقع المراره .. وأشياء اخريات !

روحوا إحرقوا دمكوا !

 –

هام للي عاوزين يشتموا .. قبل ما تشتم حاول تفهم مره !

مهاجمة الشيوخ اللي بيطلعوا فتاوي زي دي .. مش مهاجمة للإسلام ولا نيل منه .. لإن دول مش متحدثين رسمين بإسمه

يعني انت عارف ان في فتوي طلعت من كام شهر بتقول ان الإحتفال بأعياد الميلاد حرام .. يعني لو عندك بنت .. ولا ولد ولا حتي انت …وعايز تعمل عيد ميلاد  .. ده حرام .. ومش بس كده .. الفتوي دي بتقول ان لو فتحت بقك وحاولت تنتقد فتوي زي الفتوي الأولانية .. تبقي حرام برضه .. وتتجلد .. وتوصف بالسافق

بذمتكوا ياللي هتشتموا .. مش ده هو الحرام بعينه!

بذمتكوا هل ينفع ناس زي دي تبقي هي اللي بتعبر عن الإسلام وتطلع فتاواه ؟!

فتوي تانية طلعت بقتل أصحاب القنوات الفضائية .. وقتوي تانية طلعت بتحريم مشاهده مسلسل نور .. ياسيدي وانا كمان والله ما بطيق ام المسلسل ده .. بس يرضيك .. ان دين ” اللي هو حاجه عظيمه ” يحرم مسلسل .. بذمتكوا ده كلام

دا احنا في شهر كريم يعني .. والمفروض نفشوا السلام .. معالي الشيخ ده بيفشي الإرهاب مش السلام

مفرقش عن الراجل ابو موتسيكل جاوا اللي قولتكوا عليه

لو بعد ده كله وناوي تشتم برضه .. يبقي عليه العوض ومنه العوض  وانا فعلا استاهل الشتيمة

ماشيه وساعتي مش مظبوطه
ولفين رايحه ماكنتش عارفه
لكن ماشيه وانا مبسوطه
ماشيه بخطوه ماهياش خايفه

عالرصيف واحد بيعاكس
ليه مع انه كبير في السن
في الميدان بياع جارايد
بيقول اقرا رياضه وفن

فجأة لقتني اصاد كافتيريا
قلت اما اطلب فنجان قهوه
جاتني القهوه شربت شويه
كان طعمها مش زي ما بهوى

ام واب و طفله معاهم
بس شقيه وزي الجن
كل ملتلمح حاجه تشاور
وتقول عايزه يااما حزن

فجأة لقتني في وسط محطه
والقطرات عماله تصفر
عالرصيف جنبي لقيت شنطه
وش بيضحك وش مكشر

دوشه لكن صوتك كان
جوه في قلبي بيعزف لحن
قلت اما اظبط ساعتي عشان
صوتك خلى قلبي يحن

تقدروا تحملوها من هنا

قعد فتره بعاني من ضروسي والمها المبالغ فيه بمجرد لمسها للأكل أو الشرب ساقع او سخن او حتي مسكر

 وبصراحه كنت بكسل اروح لدكتور السنان علشان عارف انه عمره ما هيعالجني في جلسه واحده ويريح دماغي .. بجانب إني مش فاضي لوجع القلب ده ومش مصدق فكرة اني يكون عندي معاد عند دكتور السنان كل شوية .. ورايح فين يامحمود رايح عند دكتور السنان وجاي منين يامحمود..اصلي كنت عند دكتور السنان .. واظبط مواعيدي علي مواعيد الكشوف .. حاجه بييض يعني

 المهم .. سيكا سيكا الوجع زاد أوي وأضطريت انخ واروح لدكتور علشان يقوللي بعد الكشف .. ضروسك عايزة تتحشي .. اقوله ببساطه اوكي .. يقوللي ببساطه اكتر لا اصلي بجدد العياده ومعنديش ادوات حشو !! .. طب وحضرتك ليه يادكتور بتكشف .. قاللي الكشف تشخيص مش اكتر .. يعني انت تاخد خمسين جنيه ” ياحرامي ” وتقول لي اصلي معنديش ادوات حشو !

 طبعا الجمله الاخرانية قلتها في سري .. نهايته .. روحت لدكتور تاني قاللي ده حشو عصب .. وهيتكلف كذا .. كان مبلغ كبير بس قلت اشطا..وبدأنا المشوار في اكتر من خمس جلسات.

 كل جلسه ميحلالوش الرغي الا وهو شغال جوه الضرس .. طبعا حشو العصب ده معنها انه هيقتل العصب ويعمل حشو جذور وبعد كده يعمل حشو بلاتين

 تمويت العصب في حد ذاته شبه علقه سخنه بتاخده .. لانه بيقتله بحاجه شبه الدبوس ويقفضل يقطع فيه .. والمفروض انك تكون متبنج !

 بس تقريبا هو استبخل وبعد الجلسه الاولي مبقاش يحط بنج

 المهم ميحلالوش الرغي معايا نظام … انت بدرس ايه وعندك كم سنه وبتاع .. الا وهو شغال جوه الضرس وانا فاتح بقي زي الحمار

ومش بس كده بيطالبني بالرد !! وبأني اتكلم بمخارج حروف سليمه ..

يعد كل جلسه اقول له .. خلاص كده .. انا خلصت سيئاتي .. يقوللي لسه فاضلك كم جلسه ..

 المهم بقي انا اني واحده صديقتي .. اول ما كتبت في الـ”إز ” بتاعتي إني سناني وجعاني وبتاع .. قعدت تهزر معايا وتقوللي يا ابو سنان مسوسه .. بس لما سئلت الدكتور وقاللي لو انت بتغسل سنانك فعلا وبتاع فالموضوع ممكن يكون وراثه .. وطبعا انا بغسل سناني من زمن يعني.. فهذا جناة أبي  . ..

 المهم بقي انهم ضرسين مش ضرس واحد .. وعملت واحد ولسه فاضل التاني ..

 عني لسه طبق الاصل العلقة اللي فاتت

بعد كارثة الدويقة .. والنظام اللي بيقسملنا اللي بيتسبب في وقوع الكارثة ومبيغرفش يحلها! ..والناس اللي مش طيقاه  لدرجة إن المحافظ بيترمي بالطوب !

خلونا نفتكر ان اللي  عمل أحدث المحلة كانوا مين بالظبط ؟

وخلونا نفتكر برضه تقرير الأمم المتحده اللي قال إن مصر فيها ١٢٢١ منطقة عشوائية مثل عزبة الهجانة تأوي عدداً يتراوحبين ١٢ و١٥ مليون نسمة

وانا بقي هفتكر لما رحت حكر أبو دومه عشان كنت بعمل سيرش في الجامعه .. وشفت ان العادلي ان الناس عايشه تمانية في الغرفه !

حوار في المصري اليوم .. قال فيه اللي دايما بيقوله .. واللي انا اصبت ببرود تجاهه وتجاه ما يشبهه وبقول في سري .. قشطه .. مش مشكله .. “ دعه يعمل .. دعه يمر .. دعه يهزي .. دعه يفر “

لكن المره دي بقي الدكتور زغلول حب يسللّي صيامنا بكام جمله كده، احب تقروها معايا .. وهكون حريص إن أخد  الجمل فرادي لكن مش بهدف التغيير من سياقها ..واللي مش مصدقني يقدر يروح عالحوار كامل ويشوف بودانه ويسمع بعنيه

بداية النهضة الحقيقية لن تأتي إلا بأسلمة التعليم

 أن كثرة الجامعات الأجنبية في مصر من بريطانية وفرنسية وألمانية وكندية وغيرها تعد كارثة حقيقية لأنها وسيلة للتغريب

 الحكومة علمانية بل دهرية

 عارفين دهرية يعني إيه؟

 واللي فات كله كوم .. واللي جاي كوم تاني خالص

 معالي الدكتور قال “ أنا عندي معلومة أن الوزارة الحالية والمكونة من ٢٧ وزيرا ليس فيهم سوي ٢ بيصلوا.. فكيف لهم إذن أن يعلموا الناس الإسلام أو يطبقوا الشريعة أو العدل في البلد؟“

 طب والنبي انا بخطرف .. ومجنون .. ومتخلف .. والحكومة ” دهرية ” .. بس إزاي يادكتور وصلتلك المعلومة دي .. طب والاتنين اللي بيصلوا بيصلوا فرض بس ولا فرض وسُنه .. وياتري ياهل تري .. بيسبحوا بعد الصلاه ولا بيقوموا علي طول ؟

حاجه تفقع المراره .. نهايته….. اسيبكوا مع الفاصل الغنائي

هاكونا ماتاتا .. حكمة نغمها لذيذ 

الإنسان والمستقبل  فيه كل التركيز 

هذا هو البهليز .. والكلزبيل

مجموعه من الشباب عملوا مركز وسمُّوه مركز الحياه للإبداع والثقافة

المركز هدفه اللي نخشش في دماغي أخر حاجه .. هو إقامة بؤرة ليبرالية حقيقية في مصر يكون الشباب هما وقودها الأول

والموضوع ليه أصل  .. لما فكرت لقيت إن اكتر ناس متفرقين ومتشرذمين هما الليبراليين .. واكتر توجعه مُفتَقد ” علي الاقل من وجهة نظري ” في المنابر الإعلامية هو التوجه الليبرالي .. يعني عندنا جرايد إسلامية .. وقومية وحتي إشتراكية وفضائيات إسلامية وقومية.. لكن لو فكرنا في منبر إعلامي نقدر نقول علي إنه ليبرالي التوجه .. للأسف مش هنلاقي

الحلم اللي بكلمكوا عنه هو حلم الحيــــاه

 فأحنا كمجموعة من المؤسسين للمركز ده شايفين إن الليبرالية مش توجه سياسي .. لكن شايفين ان الليبرالية طريقة للحياه

 أما عن الأمال اللي ممكن تنتظروها من المركز ده .. فهي كتير .. انا عن نفسي مش قادر اعمل ليها حدود

 والمره دي جوايا ثقه مهياش عادية .. اننا هنقدر ننفذ كل اللي بنأمله من البؤرة الليبرلية دي

 والأيام القريبة اللي جايه عايزنكوا معانا .. وتكونوا ويانا في كل مشروع وعمل وتجمع وقعدة لإنكم لازم تكونوا واثقين من الحياه .. واثقين من الحرية .. مؤمنين بيوم قريب هيكون منصف لكل الحالمين بيها

اليوم ده مش هيجيلنا .. اليوم ده لازم نروحللّه

راجع البيت وعنيا مزغلله .. وحالف ما ابص علي اي بتاع جرايد لكن عنيا بتهرب مني وبلمح مانشيت أحمر منسوب لأحمد نظيف بيقول فيه : خط المترو الثالث يضاف لإنجازات مبارك

الموضوع نكش دماغي ونخشش .. هو المترو ينفع يتقال عليه أنه من إنجازات عهد معين .. يعني في كتب التاريخ هيتقال إن إنجازات عهد مبارك ” اللي هو 30 سنه ” هو متروا الأنفاق .. الأندر جراوند يعني

انا أعد من مستخدمي المترو بقوة .. يعني مش بقلل من قيمته بالعكس ده ممكن يكون حاجه مهمه أخر حاجه .. بس يعني يصنف علي إنه إنجازات عصر وعهد؟

يعني إبني لما يسألني هو أنتوا مصر في وقتكوا عملت إيه .. اقول له عملت المترو يابني ؟ .. لو قلتله كده عليّ إني أستحمل ردّه ساعتها .

فاكرين فيلم ليلة سقوط بغداد لما حسن حسني أدي لأحمد عيد شريط وقال له إتفرج عليه علشان يرفع من معنوياتك لما تهبط لإنه فيه كل إنجازات مصر من حرب 73 لغاية دلوقتي  .. ولما إتفرج عليه ملقاش غير أجوان المنتخب ؟

بمناسبة المترو .. مره كنت راكبُّه وإتفتح كلام بين الناس عن إنجازات الرؤسا ووسط ما كان الناس بيسخَنوا في الحوار كان فيه راجل عجوز متكلمش إلا لما جات سيرة توشكي .. فاكرين توشكي ياجدعان ؟ لما مبارك كان كل يومين تلاته يروح يتصور جنب القمح ويرجع

الراجل كان ساكت وأكنه بيقول لنفسه إن الكلام مالوش فايده .. لكن اول ما جت سيرة توشكي علي إنها من إنجازات مبارك .. قال ” أصلهم ضحكوا عليه ! .. قالوله عبد الناصر عمل السد العالي .. والسادات رجّع سينا .. إعمل إنت توشكي بقي “وإتعملت توشكي

ربنا يستر ومحدش يستشهد بكوبري سته أكتوبر علي إنه من إنجازات العهد .. علشان الواد إبني أكيد هيكون قليل الأدب ومش هستحمل ردّه عليا!