التوازن الكوني يتطلب وجود مجموعات من الأغبياء ، أجسادههم من الحاضر وعقولهم وقلوبهم من الماضي وعهوده البائده ، يتحدثون ويتكلمون كنظرائهم من الأسوياء يتصيدون منهم ما يظنونه أخطاء ، ثم يطلقون عليها مسمسيات تتناسب مع غبائهم الفطري  ، وتتعارض مع حيثيتهم الإنسانية ، ثم تَنَفُر عنهم صِفاتهم البشرية ولا يتبقي غير الشكلية منها

ويستمر تعارضاً عظيماَ .. كالذي بين الليل والنهار والذي بين الأبيض والأسود.. او كالذي بين الخير والشر

و بفعل غبائهم وبدون ان يشعرون .. يتوازن الكون العظيم ،

وليظل الأسوياء مؤمنون بأفكارهم واثقون تماما منها ومحاولون دفع التقدم الإنساني

ويظل الأخرون تماماً كما هم !

ففضلاً .. عندما تجِدَون أحدهم .. دعوه يَمُرْ .. دعوه يَمُرْ .. دعوه يَمُرْ !

وبعد يوم 25 مايو 2005 كانت المظاهرات شئ مش غريب في شوارع وسط البلد وخصوصا ميدان طلعت حرب حيث مقر الغد والتجمع .. وشارع عبد الخالق ثروت حيث نقابة الصحفيين
في الوقت ده كانت بالفعل ظهرت جركات جديده تحت عباءه الحركة المصرية من أجل التغيير – كفاية -  .. زي عمال من أجل التغيير، صحفيين من اجل التغيير  ،أدباء وفنانين من أجل التغيير وطبعا شباب من أجل التغيير !
طبعاً شباب من أجل التغيير كانت أكثرهم نشاطاً .. وكانت فكرة التجمع تحت مطلب بعينه هو التغيير واللي ممكن يجمع تحت مختلفين كتير .. هو اكتر ما بيميز كل الحركات دي .. وشباب من اجل التغيير كانت هي الراعي الرسمي الحقيقي لكل حاجه في الشارع ولكل خبر ممكن ينزل صفحات أولي ويهز – بالمعني الحرفي – أركان نظام متعفن زي نظام مبارك !
كان ساعتها حتي الدواعي الأمنية المصاحبه للمظاهرات كانت بتبقي شبيهه لدواعي أمنية مصاحبة لمحاولات الإنقلاب .. يعني بمعني أخر لو كان فيه مظاهره في ميدان طلعت حرب .. بتنزل تشكيلات تغطي ميادين وشوارع وسط البلد كلها بما في ذلك ميدان التحرير من قبل معاد المظاهره بأكتر من 8 ساعات !
شباب من أجل التغيير هي التجمع او الحركة السياسية الوحيده اللي ” مش مكسوف ” اني إنضميت اليها .. وجه معناه ضمنياً إني مكسوف من التجمعات السياسية الأخري الي إنضميت اليها حتي لو كان عالورق بس !   وفي الواقع يعني أنا محبيتش أنضم لأي ” تجمع ” تاني غير واحد بس مؤخراً !
شباب من أجل التغيير كانت في بعض الأوقات .. وبالأخص في الوقت ده .. بتمثل صورة ممتازة محصلتش من زمان اوي بين شباب مصري .. يعني معتقدش ان فيه شباب من تيارات مختلفة قدروا يتجمعوا ” ويبتعدوا شوية ” عن اجندات تيارتهم علشان الأجنده الأهم
ولو كان ده حصل من زمان .. مكانش الحال بقي الحال .. لككن وعلشان الحلو ما يكملش كان برضه في تيارات كتير مش قادرة تتفهم شغل الجبهات ..
يعني مثلا لما كانت قضية ايمن نور شغاله .. وجلسات محاكمته في محكمة جنوب القاهره في باب الخلق .. بضغط من الشباب الناصري رفضت شباب من اجل التغيير النزول بإسم شباب من اجل التغيير في الجلسات دي للتضامن معاه .. وان اللي عايز ينزل يتضامن ينزل بضفه فردية !
ده طبعا كان غريب .. خصوصا لان “ايكون” المعارضه في الشارع كان ايمن نور .. يعني كان لسه الناس متعرفش ان فيه تجمعات تانية ممكن تكون بتطالب بالتغيير زي أيمن نور .. كانت لسه الأسامي مرتبطه ببعضها إرتباط يؤدي الي الإلتباس
أدباء وفنانين من اجل التغيير بقي .. كانت ليها طابعها الخاص والمميز .. كنت دايما واصل لقناعه بعينها وهي ان اتغيير مش هيتم الا لما المطالبه بتغييره توصل لكل الفئات .. زي الفنانين .. والصحفيين .. وحتي رجال الأعمال !
واحده من مظاهرات ادباء وفنانين من كانت في ميدان طلعت حرب .. وكانت من نظري من اعظم المظاهرات اللي حصلت .. المتظاهرين كانوا رافعين صور الفنانين بتوع زمان وهي ابيض واسود .. وكأننا بنقولهم تعالوا شوف مصر بقت عاملة ازاي ..
احمد فؤاد نجم وفتحيه العسال .. وطبعا أنشطهم خالد الصاوي .. وكان ساعتها اخر دور عامله كان في الباشا تلميذ والناس كلها فاكرينه بجملة ” كلنا هنا اسره واحده مع بعضينا “  .. وكمان شباب المسرح والشعر

في المظاهرات اللي من النوع ده .. كان ممكن بتوع الغد يطلعوا من البلكونه بتاعتهم وكذلك بتوع التجمع اللي كانوا اقل منهم بكتير .. كطريقه من طرق المشاركه مع إثبات الوجود يعني ..
المهم .. تروح ايام بمظاهرات .. وتيجي ايام تانية بمظاهرات تانية .. لغاية مظاهره يوم 30 يوليه2005

قبليها بأيام قليله كان فيه عمل ارهابي حصل في شرم الشيخ ” مش فاكر تفاصيله ” واتقال ان ممكن اية واخواتها ميعملوش مظاهره في اليوم ده عشان الارهاب وبتاع .. وخصوصا .. ان كان فيه لبانه دمها تقيل اوي في بق بعض الإعلاميين .. بصيغة .. خلي بتوع المظاهرات يرحمونا بقي .. احنا عندننا ارهاب
المهم .. ان فعلا كفاية واخواتها .. كانت هتلغي المظاهره المقرر ليها يوم 30 يوليه امام مجمع التحرير ..لكن مبارك قبليها بيوم .. اعلن انه هيترشح للإنتخابات .. مما استفذ الكثيرون بصراحه وانا كنت منهم
المظاهره اتاكد حدوثها في يوم السبت 30 يوليه الساعه سته مساءا .. انا رايح علي سته الا عشرة .. متمشي من بيتنا لغاية التحرير .. بحاول استطلع المكطان ونبضه ..  .. .. عربيات الامن المركزي فعلا كانت اتملت .. قبل الساعه 6  وعشرة .. بالمتظاهرين اللي كانوا بيهتفوا جوه العربيات … بيسقط يسقط حسني مبارك
حتي أحمد بدوي كان ليه تعليق .. بيقولي فيه .. انا قلت بتوع الامن المركزي عملوا مظاهرات جوه العربيات .. لكن طلعوا اصحابنا !
ولاني .جيت متأخر العشر دقايق دول .. فاتني كل المشاهد الدرامية اللي حصلت .. وعلي رواية بدوي .. ان جورج إسحاق اللي هوه المنسق العام الامن شده وبهدله .. وهو محمد عبد القدوس .. واعضاء مجلس مش عارف ايه .. تخيلوا بقي .. الشباب حصل فيهم ايه !
المهم .. كل اللي اتاخدوا يوم السبت ده .. طلعوا يوم الاتنين تقريبا .. بس مطلعوش كده شياكه من النظام .. لكن انا فاكر كويس ان منظمات دولية كتيره طلعت بيان بخصوص الواقعه .. بخلاف ان الشباب كلهم كانوا مليانين حماس .. وبدأوا إعتصام عند النا\ئب العام منتهاش غير بقرار منه بالافراج الفوري
كان احساس جميل بالإنتصار علي القوه المتخلفة الغير مروضه . فيه تجمع .. تم اعتقال مجموعه منه .. راح اعتصم الباقي قدام النائب العام لغاية ما تم الإفراج عن المعتقلين !
وخرجنا واحنا مبسوطين ان اللي اتاخدوا كلهم هيرجعوا بعد اقل من يومين من اعتقالهم .. ومش برجع سبب الإفراج عنهم من الخوف من الإعتصام بس .. او شجب المنظمات الدولية بس .. او للاتنين مع بعض .. بس الحاله العامه هي اللي كان ليها السبب في ده..
كان فيه مستقلين كتير في الوقت ده في العمل السياسي .. واستطيع ان اجزم ان المستقلين – بس – .. هما اللي كانت اجندتهم متحملش ضمنيا اجندة اي تيار تاني..واللي بيسعوا ليه .. مصلحة البلد مش مصلحة تيار ” ايون ساعات المصلحتين بيتعارضوا مع بعض
يعني وائل عباس .. كان هو النافذه الإعلامية الأولي اللي كانت بتصور الوقائع دي .. وتنقلها للناس .. بطريقة صورة ابلغ من مية مقال يروي اللي حصل
ومظنش انه كان عنده اي اجنده تانية غير التغيير ”

يتبع.. !

انا بقي النهارده ليا مزاج ” اخر حاجه ” اني انكش في دماغي وافتكر حاجات حصلت من زمان .. بس مش زمان اوي .. زمان كده بتاع واحد عنده حاجه وعشرين سنه .. يعني هيبقي بالكتير تلت اربع سنين !
مش مجهز فكرة عايز اقولها .. ولا نتيجه عايز اوصلها .. بس هكتب اللي هفتكره شوية
في نص شهر فبراير سنة 2005 .. لقيت التليفزيون كله مقلوب علي انه مبارك في خطاب جماهيري طلب من مجلس الشعب تعديل الماده سته وسبعين علشان يتيح اختيار الرئيس من خلال .. الخ الخ الخ
المهم ان قبل الخطاب ده بفترة مش كبيرة كان فيه تقريرين عالجزيرة لفتوا انتباهي قوي
التقرير الأول كان عن محامي رافع قضية علي مبارك بصفته بخصوص عدم تعينه نائب والقضية دي كانت مهمه جدا .. لان كانت جديده في جرأتها
الجزيرة كانت بتابع القضية عن كثب لدرجة ان تطورتها كانت بتنزل علي البار نيوز في تأجيل او غيره !
التقرير التاني كان بيتناول تلاته ناويين يترشحوا لرئاسة الجمهورية .. مش متذكر منهم غير نوال السعداوي
وانتهي التقرير بإستحالة وصولهم حتي لمرحلة الترشيح لان الدستور في الوقت ده مكنش يسمح !
عمر ونيرفانا في القاهره اليوم وجرنال الدستور كنت مبصوط اوي ومستمتع بمتابعتهم  وكنت شايف فيهم صوت نغمته مطلوبه اوي في الوقت ده
عدت الايام وجت ايام .. وانا كل ده مكنتش حاولت اتابع الاحداث بطريقة غير الاعلام .. لغاية ما معاد يوم الاستفتاء قرب واليفط بدأت تظهر في الشوارع في كل مكان .. بتساند مبارك وتقويه وتبارك خطوته .. وامناء الحزب الوطني رفعوا اليفط وقالوا عليها انهم موافقين تماما علي التعديل الدستوري ” ساعتها سألت نفسي سؤال .. مادام كلكوا شايفنينه صح .. ليه مطلبتوش انتوا انه يتعدل مع ان القانون بيقول ان تلت المجلس من حقه يطلب تعديل اي ماده في الدستور “!
حتي فاكر ان كان فيه بانر عملاق .. اكبر بانر شوفته في حياتي ..  وكان علي ماسبيرو !
المهم .. جه يوم 25 مايو 2005
ولغاية الوقت ده مكنش عندي راي واضح وصريح سواء كان سلبي او ايجابي تجاه النظام .. واخترت اليوم ده اني انزل واشوف البلد هتبقي عامله ازاي
وفعلا نزلت وكنت سامع ان فيه مظاهره هتتعمل قدام نقابة الصحفيين ولما نزلتمش فاكر الساعه كانت كام ..بس كانت الدنيا صبح
لقيت الشوارع متروسه بالامن المركزي .. قدام النقابة ستات غريبه لابسه اسود .. بيتظاهرو للحزب الوطني وبعد كده سمعت صويت بصوت عالي وناس بتجري في كل مكان .. وشتايم هنا وهناك .. ولاسلكيات شغاله .. مشهد معقد اوي صعب اوصفه  .. المهم انا قلقت وخدها من قصيرها وروّحت
روحت علشان افتح التليفزيون .. ولقيت كل حاجه عادية .. استنين اشوف عمرو اديب ..يومها كان يوم الخميس .. ومجاش .. المهم تابعت عالجزيرة وبتاع وعرفت طشاش عن اللي حصل .. لغاية ما شفت التفاصل اكتر ..  وعرفت اللي حصل لرابعه ونوال وغيرهم .. من البنات اللي حصلهم اعتداء قدام نقابة الصحفيين في شارع عبد الخالق ثروت في وسط القاهره ..
ساعتها انا كان لسه عندي 17 سنه مكنتش لسه فاهم كل حاجه حوالية .. بس الحاجه الوحيده اللي فهمتها .. انتوا داوشين اهالينا من ساعة ما اتولدت .. ” مبارك الامن والامان ” وكفاية انه كفانا ويلات الحروب وبتاع
ياخي يلعن ابو ده امن وامان اللي يخلي البنات تتقلع في وسط الشوارع
وعلي فكرة بعد ما الموضوع اتنسي شوية .. النائب العام حفظ التحقيق ..
يتبع!

النهارده 20 مارس  2009 .. زي النهارده من خمس سنين .. تحدت امريكا العالم كله وببلطجه وضيعه بدأت في شن حرب علي العراق
فاكر كويس ان يوم الجمعه القريب من اليوم ده في سنة 2003 كانت خطبة الجمعه لشيخ الأزهر ” محمد سيد طنطاوي ” عن عيد الأم .. واسترسل الحديث عن مكانة الأم في الإسلام .. إلخ
ساعتها اسقط شيخ الأزهر أهم شرط في خطبة الجمعه وهي انها تكون عن موضوع يهم الناس ويشغلهم .. واكيد في وقت ضرب العراق مكنش عيد الام هو الموضوع الأمثل !
كلام شيخ الأزهر عن حرب العراق في الوقت ده .. مكانش هيندرك كتدخل من رجال الدين في السياسه .. علي اد ما كان عدم كلامه اصبح إقحام لنفسه في السياسه
في كلمات اخري .. اقصد انه متكلمش علشان حسبها ” او جاتلوا اوامر ” وخاف من ان الناس تسخن او يقول كلام يتنافي مع ما يسمي” السياسه العليا “.. في حين انه لو كان مثلا إتكلم عن إراقة الدم بين بني الإنسان وإزاي ده محرم في كل الأديان .. وان الدين الجائر او الغير واضع حياة الإنسان في مكانه مقدسة هو دين الإرهاب بعينه مكانش هيبقي اقحام للدين في السياسه اطلاقاً .. عالاقل من وجهة نظري
لكن شيخ الأزهر إختار انه يفضل في اقذر ركن من اركان الغرفه .. واختار انه يكون بطل واقعه زي دي
-
يزعم البعض ” وانا مش منهم ” ان الحراك السياسيي لم يبدأ في 2005 ولكنه بدأ في 2003 لما خرج المصريين من اجل العراق .. وبررّوا ان خروجهم ده مكنش بس ضد العدوان الانجلوامريكي ” الوقح ” للعراق ..  لا دا كمان ضد الأنظمة العربية عموما والنظام المصري خصوصاً
وان كان فيه حاله عامه من السخط العام علي النظام ومبارك شخصيا في المظاهرات دي .. طبعا ده علي حسب ما اتحكالي من الأصدقاء لاني مكنتش شريك في الأحداث دي من قريب ولا بعيد
لكني بعترض مع الكلام ده لان ببساطه السخط علي مبارك من ايام التسعينات .. بس كله كان حاطط في قلبه وساكت .. وكان كل مظاهره عن فلسطين ولا عن العراق .. كان مش بعيد خالص انه يتقال شعار زي ” يامبارك ياجبان ..ياعميل الأمريكان”.. يعني الشعار ده متقالش بس في 2003
–
بس المشكله في نقطه تانية .. نفس الناس ” تقريبا ” اللي بيقولوا ان الحراك السياسي لمصر بدأ من 2003 مع غزو العراق .. هما برضه اللي بيقولوا ان المصريين دايما بيتحركوا للقاضايا العربية اكتر ما بيتحركوا للقضايا الداخلية.. ” انا مش مختلف مع ده ” .. لكن اللي انا مختلف معاه بقي .. انهم يرجعوا ده للفطانه الفطرية للمصريين .. مش لسطحيتهم المكتسبة عن الإعلام اللي صور ان عدو مصر الاول والاخير هو امريكا واسرائيل .. وان الخلاص الوحيد في الوحده العربية؟!.. مش في محاربة الفساد الداخلي الاول
-
سنه فس سنه ..الهوجه بتاعة العراق قلت شوية .. بقت المظاهرات اللي بتحصل في الغرب وبالاخص امريكا اكتر بكتير من اللي بتحصل في اي دولة عربية
ومنهم مصر .. بدليل ان تقريبا من سنيتن مسمعناش ” او مسمعتش ” عن حتي دعوة للتظاهر من اجل العراق .. تكونشي المشكله اتحلت والامريكان خرجوا من العراق وانا مش حاسس ؟
النهارده شيخ الجامع لما خطّب .. إتكلم عن فضل الأم ومكانتها في الإسلام .. ومنسيش يقول الحديث بتاع.. امك ثم امك ثم أمك
ولما صلّي بينا قري الايه بتاعة .. ولا تقل لمها افِ …”

لكن للأسف متكلمش عن الأمهات اللي فقدت ابنائها في عدوانات وقحه ..

وللاسف برضه لسه مشكلة العراق موجوده وقائمة بعد خمس سنين من عزوها
ولسه مشاكل تانية كتير بيعاني منها الجسد الإنساني ..

maybe it can describe my mood this days !

ده إسم المسابقة اللي منظمها إتحاد الشباب الليبرالي المصري .. واللي بتهدف الي ان كل شاب أصغر من 35 سنه يكتب مقاله وببساطه يقول فيها هو ليه ليبرالي ؟

سييكوا من ان احسن عشرين مقال هيتنشروا في كتاب وان احسن كاتب مقال هيسافر في دورة عن الليبرالية زي ما مكتوب في جروب الفاس بوك الخاص بالمسابقه  ..

وسيبكوا كمان من ان الكتاب ده لما يطلع هيكون بيملي مكان فاضي جدا …لانك لو حبيت تقرا كتاب عربي عن الليبرالية غالبا مش هتلاقي غير كتب السلفيين اللي بتتكلم عن الليبرالية كأنها كفر بيّن واضح صريح !

بس الفكرة نفسها .. ان الشباب يقولوا ليه هما اختاروا انهم يكونوا ليبراليين ..

واكيد كل واحدعنده اسبابه الوجيهه لده ..

حتي لو كان السبب ده عبارة عن كلمة واحده بس بتلخص كل اللي هو عايز يقوله .. وبتقول بكل صراحه وبكل بساطه .. ليه هو ليبرالي  !!  ؟

طب روحوا شوفوا الراجل ده كده مبسوط إزاي وهو بيغني I’m a liberal

اهو انا مثلا عن نفسي .. ممكن اكون ليبرالي علشان بس المعاني البسيطه اللي موجوده هنا  !

عالعموم .. اظن ده دورك انك كمان تفكر وتكتب وتقول بكل ببساطه ومن غير عقد ولا كلام مجعلص ورخم .. ليه انت ليبرالي !.. مش كده ولا ايه ؟

عالعموم لمعلومات تانية .. تقدر تدخل عالموقع بتاع المسابقة وتعرف تفاصيل اكتر

 ——

الكود ده تقدر تحطه في مدونتك او فاسبوكك .. وتعلن عنه عن المسابقة

—–

<p style=”text-align: right”> </p>
<p style=”text-align: center”><a href=”http://www.librali.net” target=”_blank”><img src=”http://img518.imageshack.us/img518/3770/n591580008423739.jpg” /></a></p>

Even in the most dirty places .. we can find the natural beauty !

 تصنيفي طبقاً للصورة عاليه ..اني ممن يتبعون الشهوات! مش غريبه.. مش كده ؟

إمبارح وزي كل خميس بدأ النهار بمكالمة مع واحد صاحبي بنظام .. النهارده الخميس بأه وحركات .. ايوهه ياعم هتسهر فين .. انا رديت وقلت لسه مش عارف .. هو قاللي ايوه ياعم بس خللي بالك النهارده الخميس يعني .. انا قاطعته .. عيد ميلاد إبليس .. هو رد في محاولة للألش .. يأخي إبليس ده غريب اوي .. عيد ميلاده اربع مرات في الشهر !
المهم .. قبل ما انزل بشوية .. شامم ريحه غريبه .. ومش عارف احدد هي ايه بالظبط .. وبعد كده كالعادة كبرت دماغي ونزلت .. كانت الساعه حوالي تسعه ونص  .. وانا بقي عامل فيها الشاب الكول اخر حاجه وضارب برفييم اسمه بلاي بوي .. وطبعا زي ما هو واضح من اسمه ليه دلالات مش ولابد!
دوست علي زرار الأسانسير  .. لقيته مش شغال .. استغربت بس برضه كالعاده كبرت دماغي .. قعدت ادندن ونزلت عالسلم .. كل ما انزل دور الاقي الرؤية بقت اصعب .. برضه كالعاده كبرت دماغي .. لغاية ما وصلت للدور التاني .. ولقيت خير اللهم اجعله خير .. الرؤية بقت منعدمه من كثافة الدخان الأسود وقلت بس بقي يبقي فيه حاجه .. ناس رايحه جايه في الدور عمالة تكح وصوت صرخ وناس بتقول حد ينده المطافي .. البواب كان موجود قلتله بكل بساطه وهدوء .. ما تتصلوا بالمطافي .. قاللي بهدوء اكبر منه .. لاء .. اصلي المطافي لو جت ولقت مفيش حريقة ممكن تدفعنا غرامه .. قلتله بهدوء اكبر .. انت شايف ان مفيش حريقة يعني .. انت ادري !
المهم محاولات السكان نجحت بقوة في السيطرة عن الحريق … ومن نحية صاحب الشقة ..أكد .. انه مش معني ان الحريق سببه ماس كهربائي يبقي يجوز ربط الحريق بأي حريق ماضي زي حريق مجلس الشوري او المسرح القومي
بي اس : هي الصورةى اينعم ملهاش علاقه بالحريق .. بس هي اللي طلعتلي لما عملت سيرش عن يوم الخميس !