بياع الطراطير
مؤتمر القلة المندسه يعقد بالتوازي مع مؤتمر – من أجله هو -
فليتكلموا .. ولن تصمت القلة المندسه
من أجلك أنت 2 !
مره أخري .. لم يفكر مروجي الحملة الإعلامية لمؤتمر الحزب ” الوطني الديمقراطي ” عندما وضعوا لافتات ” من أجلك انت ” علي مقرات الأحزاب وعماويد نور الكباري – لعل كونها من أهم إنجازات إدارات الحزب المتعاقبة – .. في أن بعض الكوارث “العابرة” التي وقعت نتيجة فسادهم هي أول ما يظهر في خيال اي قارئ لشعارهم – من أجلك أنت – !
من أجلِكَ أنتّ .. !!
إختار الحزب الوطني ان يكون شعار مؤتمره هذا العام – من أجلك انت – ولم يحدد علي منْ – أنت – عائده !
وترك هذا التحديد لفطانة القارئ وذكاءه ..
الحزب إختار – أنت – ولم يختار – أنتم – لأن واضح الشعار يعلم جيدا من هو – أنت – اللي ولا انا ولا انتم لينا علاقه بيه !
فـ – أنت – ليست عائده عليّ او عليك أو علي قريب لي او لك او حتي “معرفه “ من بعيد
- أنت – عائده علي الشحص الوحيد الذي يعمل الحزب كله ..بل الدوله كلها بجميع أجهزتها من أجله وليس من أجل اي أحد أخر
فليعملوا هم من أجلِه – هو – ولكن بعيد عن دماغنا – نحن
طوارئ الداخلية قطاع خاص
من يومين الساعه 1 الصبح كنت سايق عالمحور وعملت حادثة – تفاصيلها متهمش ف حاجه – المهم اني اجبرت اني اركن علي شمال الطريق وما ادراك ما شمال الطريق عالمحور الساعه 1 الصبح !
حاولت اجيب اي ونش – لأن العربية مكنش ينفع تتحرك - ..لكن الوقت كان متأخر وانا كنت بعيد عن البلد .. والموضوع كان صعب .. المهم اللي عايز احكيه اني اتجنننت وقلت اكلم نمرة الطوارئ
رد عليا النجده .. وقولتلوا انا عالمحور عالشمال والعربية لازم تتشال .. بصراحه والحق يتقال .. اهتم جدا ! .. وقالي طب يافندم تحب ابعتلك ونش .. قولتلي احب اوي .. قالي يافندم ابعتلك حاجه تانية غير الونش .. عندكوا اي مشاكل تانية .. قولتله لا شكرا !
قالي خد النمرة دي وف خلال ربع ساعه هيكون عندك وهيوديك مكان ما انت عايز .. فعلا اتصلت بالنمرة اللي ادهالي .. لقيت الراجل بيرد عليا .. تحت امرك ياباشا .. انت فين بالظبط .. وصفتله .. وقالي عايز تنزل فين .. قولتله وسط البلد .. فالي عشر دقايق واكون عندك وحسابنا هيبقي 350 ان شاء الله
مستغربتش من السعر .. بس قولتله .. هو انت مش تبع الداخلية؟ .. قالي – ببديهية شديده – لا ياباشا .. انا قطاع خاص .. بس مدي نمرتي للي بيردوا علي تليفوانات النجده .. ونفع وإستنفع يعني ياباشا !
بس خلاص – نقطه -
لازم تبوس !
خلاص دلوقتي بقت رسمي .. الشعب مطالب بالبوس .. كل مواطن دلوقتي لازم يبوس .. واللي مش هيبوس هيطلع ميتينه .. مش بوس ليلة الخميس .. ولا البوس اللي بيجيب الانفلوانزا .. لا ده بوس جزم بشوات البلد
هو ده الإستنتاج الوحيد المقبول بعد اللي اتعرض ليه المدون – دماغ ماك – واخوه في برما, الغربية علي إيد الظابط محمد الدهراوي
إتعرض ماك لسب وقذف غير الضرب اللي سايب اثار علي جسمه لمجرد ان الظابط – عايز يعلمه – انه لما يشوف عسكري يبوس جزمته
انا بقي بطالب الداخلية بتنظيف جزم العساكر والظباط الميري – علشان لما نيجي نبوسها يعني وكده
وياريت موضوع بوس جزم – معاليهم – يكون منظم .. يعني ياريت مفيش مواطن يبوس جزمة واحد بس مرتين .. كل يوم نبوس جزمة عسكري ولا ظابط غير التاني .. علي اساس ان عينا يعني متطلعش في اي حد بوسنا جزمته قبل كدهه
وبالنسبة للنسوان اللي بتحط – روج – ياريت يبقوا يحطوا روج نفس لون الجزم علشان لما يبوسوها ميلغبوططوش شكلها
.. وأعتقد ان الظباط والعساكر متمرنين كويس إزاي يحطوا جزمهم للناس علشان يبوسوها .. اومال يعني كانوا بيعملوا ايه في الجامعه غير انهم يتمرنوا علي كده ويعلموا ازاي يشتموا الناس
وبالمناسبه … سمعت ان كليات الشرطه فيها ماده عن حقوق الإنسان .. تقريبا كده بيقولهم هي دي حقوق الإنسان اللي المفروض تنتهكوها !
