تحذير : هذا البوست قد يحتوي بعض المعاني السلبيه

كنت ناوي اطلع احج السنه دي .. وقبل ما انام كنت عمال افكر في منظر الكعبه الجميل .. والحالة الر وحانية اللي موجوده هناك .. وفكرت شوية في ايه الحاجات السلبيه اللي ممكن تعكنني وانا هناك .. ودماغي مجابتش غير يافطه ممكن يكون مكتوب عليها  ممنوع دخول غير المسلمين .. وشفت ان اليافطه دي ممكن تحمل بعض معاني العنصرية حتي لو بشكل غير مباشر

 دماغي مجابتش غير الصورة السلبيه دي وتقريبا السبب اني  كنت نعسان وعايز انام .. والقدر اراد اني اشوف صور اخري للعنصرية ولكن في عالمي الاخر .. في الاحلام

او بالاحري الكوابيس

 لما اليونفرسال كاونتر بدأ في العد التنازلي .. وبدأ عرض الحلم .. لقيت نفسي في رمي الجمرات .. برمي بقوة وانا سمع جني واحده بترمي ” بغل ” اوي وبتقول انت اللي خلتني اخون جوزي ” طبعا بتكلم ابليس ” روح منك لله

 المهم وعلي خلفية ان المكان كان زحمه جداً .. وانا ماشي دوست علي رجل واحد .. وزي ما بعمل في اي ماكن لما بتعرَض لموقف مشابه .. ببصله وانا مبتسم وبقوله ببساطه سوري !

 عملت زي ما متعود لكن الراجل ماعملش زي منا متعود اشوف .. لقيته مسكني وقالي انت منين .. قولتلي وانا متفشخر من مصر .. بلد السبع تلاف سنه حضاره .. ومهبط لكل الاديان ..

 وقاللي والله ما هسيبك .. ايش هيدي .. تيك تيك تيك .. خدني عالمحكمه  طوالي  ولقيت قاضي .. كان جاهز .. واول ما عرف اني مصري .. قال خلاص 950 جلده كفاية … بوافع خمسين جلده كل جمعه بعد الصلاه !

 وفي اول جمعه .. وقفوني في ميدان .. وقلعوني التيشيرت اللي كنت معتز بيه عشان من حاجاتي القليله اللي مكتوب عليه صنع في مصر

 ورموه عالارض وداسو عليه بجزمهّم .. وبدأوا يجهزو الكرباج والكرباج اترفع عشان ينزل علي ضهري وفي اللحظات دي قعد افكر .. لو كنت امريكاني .. ولا انجليزي ولا حتي عندي اي جدنسيه من بلد اوروبيه .. كانوا عملوا فيا كده .. ولا حتي كانوا استجروا ؟.. وفكرت برضه .. اني  الريس اللي سلامتي وانا بره البلد مسئوليته الشخصية “بنص الدستور ” عمللي ايه ؟.

.. وهووووووووبا .. صحيت من النوم .. وانا بحلف اني مش هعتب عتبة الاراضي المقدسه ومصري بيها محبوس

اسيبكم مع حبة اغاني !

http://www.youtube.com/watch?v=s3UUBkVMHW4

http://www.youtube.com/watch?v=Uk6eQAkwM_w&feature=related

http://www.youtube.com/watch?v=vfpNDkGI03A&feature=related

امبارح كنت بتكلم انا واصحابي عن تاريخنا كأطفال .. وايه الاغاني اللي كانت علي ايامنا .. والكلام خدّنا ووَدانا ومشورنا علشان نتكلم في كل مظاهر الحياه من حوالينا واحنا عيال .. وضربنا كف علي كف وقلنا كل حاجه اتغيرت .. !

بس احنا نسينا حاجه مهمه اوي مقلنهاش لأنها متغيرتش  .. وكبرنا وهي معانا .. وقربت تبقي جزء من هويتنا  .. وهي السحابه السوده .. ومن سنين طويله  .. وانا بشوفها  وبشوف معاها كل وزير بيئة ييجي يقول السنه دي هنحلها وهنقضي عليها .. وللاسف السنه اللي بعديها بتبقي مشرفانا برضه

طبعا السحابه السودا بدأت واقعياً سنة 99 .. وكان بيطلق عليها اسم السحابه السوده .. وكان ساعتها بتقعد 3 اسابيع او شهر بالكتير !

وفاكر وانا اصغر من دلوقتي  بكتير .. يعني وانا في اعدادي مثلاً .. طلع علينا وزير بيئة وقال بطرف مناخيره ..  ان مشكله السحابه السوده علشان تتحل لازملها ما لا يقل عن خمس سنين ..

قلت بس .. الراجل جاب من الاخر وضرب رقم كده عشان يشتغل براحته ويقضي عليها بجد !

لكن للأسف الخمس سنين عده وكمان عليهم سنتين تلاته ولسه السحابه السوده بتجيلنا في معادها ومتتأخرش ..

سوق عربيتك او اركب ميكروباص بعد الساعه واحده وشوف الطريق قدامك هيبقي عامل ازاي .. وحياتك انت ..ولا شابورة الزراعي الساعه سبعه الصبح  .. عتمة في عتمتين  !

وانا بقي وسط حرقة الدم دي كلها .. الاقي رساله جيالي عالموبايل .. خير اللهم ماجعله خير .. ” حرق قش الارز بيضرنا كلنا .. بلّغ عن حرق قش الارز علي تليفون 19808″ ..

شوية من اصحابي شافوا ان ده حاجه ايجابيه .. بس انا كان رايي متلخص في كلمة واحده بس .. وهي ” بلا خيبه ” ..

بقي دولة .. بكل كيانتها واجهزتها .. مكفهاش اكتر من عشر سنين علشان تقضي عالسحابه السوده .. وجايه تقضي عليها بالاس ام اسات ؟!؟

بالاس ام اسات ياوزارة “بيئة” .. بالاس ام اسات .. بس انا زعلان .. كانوا المفروض يخلوا في سكوتر هديه للي يبلغ عن حرق القش   .. !

ارحمني برحمتك الواسعه يارب .. !  انا هدعي احسن بالمستحيل .. يارب طوّل في عمري يارب لغاية مااشوف البلد دي من غير السحابه السوده بتاعة قش الرز .. والغمه السوده بتاعة مبارك والحزب والوطني !

دخلت مرة ف جنينة

دخلت مرة جنينة اشم ريحة الزهور

وسلّي نفسي الحزينة واسمع نشيد الطيور

بصيت لقيت على الغصون بلبل ويّا وليفته
واقف معاها بسكون  انا فرحت لما شفته

فارد جناحه عليها وبيراعيها بحنان
وهو من حبه فيها غنلها لحن الأمان

وقال لها يا ملاكي اللي تعوزية اطلبيه

روحي وعقلي فداك حبيبك أوعي تسيبيه
وبعد مدة طويلة في شرب كاس الوصال
لقت حبيبته الجميلة زادت عليه الدلال

طارت ما سألتش فيه وخلفتله العذاب

مسكين يا روحي عليه قلبه من الوجد داب
سهر يعد النجوم والبدر شاهد عليه

طالت عليه الهموم وبس يصبر بإيه

واللي كمان زاد عذابه وليفته لافت بغيره
وزودتله مصابُه وساء يا روحي مصيره

خرجتِ صعبان علي حالتُه تبكّي الجماد
حفظ ودادها وهيّ خانت عهود الوداد

في تاني أيام العيد .. البنات متعرضوش لتحرش بس .. إتعرضوا لسرقة كمان .. شنط البنات ساعتها كانت بتتفتح ويتاخد منها كل حاجه فيها ..
السرقة مكانتش عادية لأن للأسف  المبدأ مكانش مبدأ سرقة .. المبدأ مبدأ عقاب  .. عقاب ليها علي انها نزلت في الوقت ده وفي المكان ده  !
صحبي اللي حضر الواقعه حكالي عالتفاصيل دي .. وأكدلي ان مفيش شنطه كانت بتقع قدام الشباب الا لما تتفتح وتتقلب عالأرض ويتاخد منها اي حاجه ثمينة!

العين الحلوة بتشوف الحلاوة .. والعين القذرة بتشوف القذاره:–)
لما عينك تقع علي بنت في الشارع ومعجبكش لبسها .. مش من حقك تبصلها بقرف .. ومش من حقك تستغفر ربنا في وشها بصوت عالي .. وبإختصار حاول تخلي المقوله اللي فاتت في دماغك.

النهارده اليوم الثالث لليلي ..

يوم ليلى هو يوم لإعادة النظر في القيم والأفكار السائدة المتعلقة بالأنثى التي يمارسها المجتمع يوميا دون اعتبار لتأثيرها على النساء أنفسهن. والدعوة هنا ليست للترويج لثقافة أو قيم بعينها، ولكنها دعوة لنقد ومراجعة سلوكاتنا اليومية برغبة حقيقية في تغييرها وتنقيتها من رواسب قهر نمارسه دائما على الطرف الأضعف في المجتمع بدلا من مواجهة أسبابه الحقيقية. لذا فالمشاركة متاحة ومفتوحة للجميع من مصر ومن الدول العربية نساء ورجال مدونين أو مواطنين يتم نقل أصواتهم للإنترنت. وللجميع مطلق الحرية في إبداء الرأي بالشكل الذي يريده مادام مؤمنا به ومسئولا بشكل شخصي عن الدفاع عنه أمام وجهات النظر المضادة ومستعدا كذلك لتغيير هذا الرأي إن اقتنع بأوجه القصور فيه

في عام “كلنا ليلى” الثالث ما زالت “ليلى” تعاني من نفس المشكلات التي دعتنا لتنظيم يوم “ليلى” الأول. و”ليلى” هو اسم بطلة رواية “الباب المفتوح” للطيفة الزيات والتي تم اختيارها كرمز لكل فتاة مصرية تحاول أن تبني شخصية مستقلة في ظل مجتمع يعتمد الكثير من أساليب القمع. ورغم استمرار المشاكل التي تعاني منها المرأة المصرية كما هي إلا أن الوعي بهذه المشاكل قد زاد كثيرا بفضل وسائل الإعلام الحر والمنظمات الحقوقية المهتمة بالمرأة وبفضل التدوين الذي فتح للفتيات والسيدات نافذة للحديث عن مشاكلهن سواء التي يواجهنها كنساء أو تلك التي يواجهنها بسبب واقع سياسي سيء في مصر و العالم العربي.

قال ايه .. خير اللهم ما اجعله خير .. قايم رايح الجامعه في امان الله .. الاقي الميكروباص بيمشي علي قشر بيض من اول محطة أحمد ماهر .. واللي كان بليد في الجفرافيا احب اقوله ان محطة أحمد ماهر هي المحطه اللي قبل باب الخلق مباشرةً

الساعه 10 الصبح .. يعني ولا معاد خروج موظفين ولا دخولهم ولا حتي تزويغهم ! ..الناس في الميكروباص بدأت تنفخ .. وبتقول هو فيه ايه يااسطي؟ .. الأسطي ردّ وقال اصلي تقريبا في محاكمة مهمه في باب الخلق ” يقصد محكمة جنوب القاهره

هو قال كده وانا افتكرت منشيتات الجرايد اللي عديت عليها في سرعة البرق اول ما صحيت .. اللي كانت بتأكد ظهور شبح سوزان تميم في باب الخلق النهارده !

شوية شوية .. وصل الميركوباص  لقدام المحكمة .. حيث كاميرات الفضائيات في كل مكان .. والمذيعات عمالين يظبطوا مكياجهم وشعرهم !

ده كان الغريب .. اما الاغرب وجود عدد كبير من الأمن المركزي ..

طب لامؤخذه بقي الأمن المركزي جاي ليه .. وانا موصلش لعلمي ان فيه اي جهه أعلنت تضامنها !

روحت عالجامعه .. وكنا عايز اعرف الحكم وماصدقت فتحت النت وعرفت انه اتأجل ليوم 15 نوفمبر !

.. وعلي خلفية ان دقني بقالها اسبوع متحلقتش .. فأجزت الحلفان بيها .. وكل ما حد يكلمني عن القضيه اقوله وحياة دقني ما هيتحبس ولا يوم

جري ايه ياجدعان ..مين ده اللي يتحبس .. هو إحنا في دولة قانون لا سمح الله .. انتوا مش عارفين طلعت مصطفي متجوز مين ؟

تقوليلي بقي أحمد عز حاطط مناخيره فيها .. واصلي شلة الشباب ناوية تجيب درفها ومش عارف ايه .. اقولكوا بس اسكتوا وبلا ميكانيكا فاضية  ..

تقوليلي اصلي الموضوع مراكز قوي ومحدش عارف ايه اللي هيحصل .. مادام اتشالت منه الحصانه واتقدم للمحاكمه .. اقولكوا برضه ادي دقني!

بيقولك .. الدوله اديته الأرض بتاعة ” مدينته ” ببلاش علي اساس انه بيعمل مشروع إسكان شبابي .. اه وربنا  ! ..

انهي شباب وانهي اسكان ده اللي في ” مدينته ” الأوربية اللي علي ارض مصرية .. طبعا دلوقتي الشعار بقي ليه معني تاني .. مش كده :–)

القضية هتفضل تتأجل كم مره .. وبعد كده غالباً هيطلع حكم زي أحكام لعبة الشايب .. يعني أخرهم هيخلوا طلعت مصطفي يشم شرابه تلت مرات ولا حاجه !

بي اس : في الأول كنت هحط صورة طلعت .. بس بصراحه لقيت صورة المرحومة احلي !

1-

مظنش اننا كنا محتاجين لفتوي تفيد بجواز إرضاع الكبير او المباركة ببول الرسول او حتي فتوي تفيد بقتل ميكي ماوس في الحل والحرم .. بقدر ما ممكن نكون محتاجين لفتوي ” إن لم يكن تشريع كامل ” يحرم التحرش الجنسي

ولكن ” علي حد علمي ” صمت شيوخ الفتاوي داخل القطر وخارجه عن التنويه أو حتي إصدار اي تصريح بخصوص ذلك  .. وقبل ان يتجادل أحدهم مع العلمانين عن حتمية ربط الدين بالدولة وان في ذلك خلاص للأمه  .. ياريت تتكلموا أحسن عن ربط الدين بالمجتمع .. مش تبقي الناس في وادي وانتوا “كإسلاميين ومصدري فتاوي “  في وادي تاني خالص !

 أتذكر وقت فتوي قتل ميكي ماوس كنت في ولاية نبراسكا بأمريكا .. وشاهدت الفتوي عبر تقارير إخبارية في فقرات ” المواقف والطرائف ” علي الإيه بي سي والسكاي نيوز وغيرها !

 وللتذكير : ” علي حد علمي ” فقد صمت شباب الإسلامين أيضا وأمتنعوا عن التعليق بخصوص سيل الفتاوي المريضة التي تلاحق المجتمع

والذاكرة مش هتعبنا لو حاولنا نفتكر ايضاً الصمت المصاحب لرفض نواب الإخوان التوقيع علي مذكرة غسقاط عضوية محمد إبراهيم سليمان ” نائب الدويقة ووزير الإسكان السابق

—-

2 -

في 2006 صدرت مجلة روز اليوسف الأسبوعية ومعها ملف كامل بعنوان ” الكذابون ” وكان هذا العنوان واصفا المدونين المصريين علي خلفية تغطية أحداث التحرش الجنسي في وسط البلد ..

وفي العيد الماضي ..

صمتت روزا اليوسف ولم تعلّق عن خير الأهرام بأحداث تحرش تورط فيها أكثر من 200 شاب في شارع جامعة الدول العربية .. وتم القبض علي اكثر من 130 شاب

 ؟ وسؤالي لمحرري ومسئولي الجريدة  .. من كان كاذبا في الماضي .. المدونين المصريين أم روزا اليوسف ..

ومن خرس فمه عن الكلام في الحاضر .. خوفا من التعليق؟؟ !

–

3 -

قرأت في حالة  أحد الأصدقاء عالفاسبوك  ..ان علماء إقتصاد يؤكدون” ان في الإقتصاد الإسلامي الخلاص من الأزمة العالمية الحالية .. وسألت نفسي .. هو ايه هو اصلا الإقتصاد الإسلامي ؟

 وهل سمعنا من  الإسلاميين في مصر مثلا رؤية واضحه بخصوص الإقتصاد ؟

 وهل حسينا برؤية  إقتصادية واضحه في اي حوار او كتيب او ندوة او منشور من قبل الإسلاميين ؟

وهل لا يهرب اي قائد سياسي إسلامي بالحديث عن الإقتصاد؟

 ولو الحقيقية غير ذلك .. فأعذروا جهللي وعدم إطلاعي وقرائتي .. وقولولي الإجابه

–

 4-

وبخصوص الأزمة الإقتاصدة العالمية .. كنت أتطلع لقراءة أراء الشباب الليبراليين ..

يعني طول اليوم بتابع بشغف كتابات إسماعيل النجار عن الليبرالية وقيمها  .. وبدوي وما يكتبه عن سلبيات المجتمع  .. لكن فعلا كنت اتمني إن أعرف رأيهم بخصوص الأزمة الإقتصادية ولكن للأسف صمتوا برضه!

بالطبع لا أطالب أحد بالكتابه قهراً .. ولكني فقط كنت أتطلع !

حسيت اني خدت بالقلم علي وشي لما سمعت عن اكتر من 300 مصري حاولوا يتهجموا علي منزل سفير قطر ” والعياذ بالله ” علشان 200 جنيه .. او بمعني اصح علشان يشحتوا منه. !

ومظنش ان الناس مالحقوش ينسوا الاغنية السعودي اللي وصفت المصريين كلهم بإنهم شحاتين !

وطبعا المصريين ميتوصوش فكان عندهم رد و رد ..وكمان رد  وده غير محاولات تهدئة الاجواء

سئلت نفسي كام سؤال .. الافعال وردود الافعال دي كلها .. هي افعال شعوب مش حكومات .. وياتري الشعوب فعلاً مش طايقه بعضها .. واحنا بنبص للسعودين علي انهم ” هبل ” والبترول هو اللي عاملهم قيمه .. وهما بيبصولنا علي اننا شحاتين ومعناش فلوس ؟ .. والأهم . هو إحنا فعلا شحاتين ؟

بس بصراحه مرضتش أجاوب

المهم ….لما  تمشي مثلاً في شارع جامعة الدول العربية باليل او الصبح .. هتلاقي أعداد غفيرة من ” عمال القمامة ” مستنين يلمحوا اي واحد اجنبي علشان يطلبوا منه فلوس. .

اما لو رجلك خدتك لشارع الهرم .. وخصوصا المنطقه اللي حوالين العريش حيث المقاهي والكفااهيات والمسرح والسنما وغيره .. برضه هتشوف نفس النوع تقريبا من الشحاتين اللي بيبقي التارجيت جروب بتاعهم هو الاجانب وخصوصا العرب

اما بقي لو بتحب تتمشي في وسط البلد .. فطول ما انت ماشي هتلاقي الاطفال قاعدين وحاطين قدامهم قلم وكراسه وقال يعني بيذاكروا .. ويشحتوا من اللي رايح واللي جاي .. وفيه منهم فيرجن نازل متحرك .. يعني يفضل وراك من شارع لأربع شوارع .. ويشد في بنطلونك .. ولو مادتيوه ممكن يشتمك او يطربك وهو ماشي .. وبرضه هتفضل ساكت .. اومال هتضرب عيل اد ركبتك والناس تقول عليك مجنون !

ولو قعدت تريح في اي قهوة .. مش هيعدي عليك خمس دقايق الا لما يعدي عليك شحات .. ويدعيلك كل الدعوات الموجوده في التلات ديانات علشان تديله حاجه!

ده غير طبعا البياعين .. اللي شويه شويه بيبقوا هيشتمواك لما تقلهم شكرا .. وخصوصا الراجل الطويل ابو جرفته وبيبيع مكن حلاقه

ولأن الحاجه ام الاختراع .. ولان المصري كبتكر فهنلاقي كمان فالفيديو ده بيبين  الطريقه المفتكسه  في الشحاته

وانا عن نفسي علي ثقه بإني الاغلبيه غير محتاجه للشحاته .. ولكن بقوا يتعاملوا مع الشحاته علي انها مهنه وطريقه لكسب العيش .. يعني برضه .. محدش يفتكر ان المثال بتاع شويكار في فيلم الموظفون في الارض مثال مستبعد ولا غير واقعي ..ولو مش مصدقين ممكن تشوفوا الصور دي هي أينعم مش في مصر .. بس مش مستبعد ان الحاله دي تكون في مصر حتي لو بشكل مختلف !

هنا الراجل بيشحت في امان الله

وهنا بيفتح شنطة العربية في امان الله برضه

  هنا حط الكرسي المتحرك في الشنطه بقي .. اومال يعني هيسوق بيه؟

هيركب بقي لحسن يتأخر

طريق السلامه يامعلللللم

استقبلت خبر العفو عن ابراهيم عيسي بكلمة “يابن الصايعه” .. وطبعا مكنتش اقصد بيها عيسي .. طب وكان لازمته ايه من الاول .. قضايا واعلام .. وشكل بايخ .. وحبة متسولين عن الحزب الوطني يرفعوا القضايا في محاولات للتملق .. وظباط امن دولة غرقانين في لشوشتهم في القضايا دي .. واتهام عيسي بإنه اللي وقع البورصه وبتاع.. بمناسبة وقوع البورصه .. قمت من النوم وعنيا مزغلله .. ومعدي جنب التليفزيون لقيت اخويا باصص ومبحلق عالنشرة وعنيه مرغرغه بالدموع من غير ما اعلّق ولا اسئله قلت ابص عالبار نيوز .. لقيته تلات تربعه بيفيد ان البورصات العالمية كلها واقعه في سابع ارض علي خلفية وال ستريت وطبعا لو فيه بورصات بتقع يبقي اولهم البورصه المصرية اللي نزلت بنسبة اكتر من 14 في الميا …

وطبعا دي نسبة كبيرة .. اينعم ممكن تكون اقل من طوكيو وبورصات تانية .. بص برضه هي في مقدمة البورصات اللي خسرت .. بس ما علينا انا مش بفهم في الإقتصاد اوي .. بس ممكن اكون بفهم في المطافي .. كذا واحد نصحني وقاللي اول ما جيت من السفر .. بدل ما تسافر وتشتغل بره .. اشتغل هنا بتاع مطافي لان واضح ان الشغلانه دي هتكسب اوي في الفترة دي .. وعلي راي السادات .. اللي مش هيعرف يعمل فلوس دلوقتي .. عمره ما هيعمل فلوس !

انا كنت في مطار مينابلوس في امريكا باكل بيتزا في امان الله .. ورساله تيجي عالموبايل تقول المسرح القومي اتحرق .. المسرح القومي إتحرق ياناس. !

المسرح القومي دخلته مرات قليله بالمقارنه بالمسارح اللي حواليه في العتبه .. زي العرايس والطليعه .. وكانت اكتر مره استمتعت فيها بعرض فيه.. كان لمسرحية قريب وغريب واللي كانت بطلتها سميحه ايوب .. وكان نصها متاخد عن قصه عالمية اسها الاشجار تموت واقفه .. مش فاكر اسم مؤلفها دلوقتي .. انما العرض كان كويس ..  ..

ولو كنت في المسرح القومي يامعلم ” قبل ما يتحرق طبعاًُ ” هتلاقي عينك بتهرب من العرض اللي عالخشبه وتروح يمين وشمال عشان تتفرج عالتحف الفنية في كل جزء من اجزاء القاعه الرئيسية .. حاجه كده ولا في الافلام .. ولا تقوللي اوبرا ولا كبير ولا صغير .. ولا درويش ولا جمهورية ولا سلام ولا حتي بالون .. القومي كان بجد ليه طابع خاص جداً

المهم .. فاروق حسني قالك ايه .. قالك ان فيه صور للمسرح .. وهيرجعوه زي ما كان .. خلاص بقي قالك فيه صور .. عايز ايه تاني ؟

الدويقة وبقاء بعض الاموات تحت الأنقاض لمدة تزيد عن اسبوع

وتهديد أهالي أسطبل عنتر بنسف الطريق الدائري

والعجز في توفير مساكن لهم

وخطف السياح من حوالي اسبوع ومعرفة الخبر من الإعلام الاجنبي قبل الاعلام المصري!

ومن قبل حريق مجلس الشوري في مشهد كوميدي.

كل ده مكانش اكتر من زيادة تأكيد علي الفشل والمصير المظلم الي مستنينيا في ظل حكومات الوطني وحكم مبارك

 زي ما واحد صاحبي قاللي .. المادة المخفية من برنامج الرئيس الإنتخابي هي كارثة لكل مواطن

ربنا يستر بقي